වසන් වන සඳ වලාකුළකට..
හඬා වැටුනට තාරකාවක්
ආයේ එන්නේ නෑ…
හිතින් යන – අය අතින් අල්ලා
නවත්තන්නට බෑ…
හිතින් යන අය – අතින් අල්ලා
නවත්තන්නට බෑ…
මවා දී තරු රටා අහසේ..
සිනා සී වුන් තරු කිනිත්තෙන්..
මලානික වූ පුංචි තරුවක්..
පොලෝ තලයට කඩා වැටුනා..
සරා සඳකට දරාගන්නට බෑ..
හිතින් යන – අය අතින් අල්ලා
නවත්තන්නට බෑ…
හිතින් යන අය – අතින් අල්ලා
නවත්තන්නට බෑ…
නිවී යන තරුවක කතාවේ..
බිඳී ගිය මතකයේ සැමරුම්..
හිතේ ගැඹුරුම තැන තියාගෙන..
ආදරේ ඉකි බිඳුම් ඇසුනා..
මලානික ඇස් හිනාවෙන්නේ නෑ…
හිතින් යන – අය අතින් අල්ලා
නවත්තන්නට බෑ…
හිතින් යන අය – අතින් අල්ලා
නවත්තන්නට බෑ…
වසන් වන සඳ…
ගායනය : ආචාර්ය වික්ටර් රත්නායක, සංඛ දිනෙත්
පද රචනය : දිල්ශාන් පතිරත්න
සංගීතය : සංඛ දිනෙත්
ආචාර්ය වික්ටර් රත්නායකයන් සමඟ සංඛ දිනෙත් ගායනා කළ මේ ගීතය හරිම ජනප්‍රියයි. සිරස සුපර් ස්ටාර් ප්‍රසංගයෙන් කලඑළි බැස්ස සංඛ දිනෙත් මේ වන විට සංගීත දිවියේ යම් දුරක් ගිහින්. මේ ගීතය අතිශය ජනප්‍රිය වීමත් සමඟම මෙහි පසුබිම ගැන කතා කරන්නට අපි හිතුවා. ඒ ගැන අපි මුලින් ම කතා කළේ සංඛ දිනෙත් සමඟ.
සිතින් යන අය ගීතය ඇත්තටම මට ලොකු ආලෝකයක් වුණා. එහෙම වුණේ වික්ටර් රත්නායක මහත්මයා නිසා. ඔහු වගේ කෙනෙක් මම වගේ පුංචි කොල්ලෙක් සමඟ මේ ගීතය ගායනා කරන්න හවුල් වීම ගැන මගේ ගෞරවය පුද කරනවා. ඔහු මීට පෙර සහාය ගායනා කරලා තියෙන්නේ, අමරදේවයන්, සිසිර සේනාරත්නයන් වගේ ප්‍රවීණයන් සමඟයි. මේ ගීතය 2018 දී ජනප්‍රිය ගී අතරට එක් වුණා. අද මම කොහේ ගියත් මේ ගීතය රසිකයන් ඉල්ලනවා.
මේ ගීතයේ පද රචනය ගැන කීවොත්...
ඩිල්ෂාන් පතිරත්න මහත්මයාගේ. ඔහු නීතිඥවරයෙක්. ජාතික තරුණ සේවා සභාවේ අධ්‍යක්ෂවරයෙක්. කලියුගය කියන පොතක තිබුණු පද පේළියක් ඇසුරින් තමයි ඔහු මේ ගීතය ලියලා තියෙන්නේ. මේ ගීතයට තනුවක් යොදලා ගායනයට උදව් වෙන්න කියලා මම වික්ටර් සර්ට ආරාධනා කළා. මට කවුරුත් නොකරන විදිහේ උදව්වක් කළා එතුමා. මම අහලා තිබුණේ ඔහු තරුණ පරපුර සමඟ විසංවාදයි කියලා. ඒත් ඔහු හොඳ කෙනෙක් කියා මා තේරුම් ගත්තා. මම ගීතයේ ස්වර ප්‍රස්ථාරය හදලා තිබුණේ. ඔහු මට කීවා සංඛ මේ ගීතය ලියන්න කියලා. මම කීවා සින්දුව ලියලනේ තියෙන්නේ සර් කියලා. ගීතය සංගීත භාෂාවෙන් ලියන්න කීවා. මට ඔහු ඇසුරේ හුඟාක් දේ ඉගෙනගන්න ලැබුණා. මේ ගීතය පටිගත කරන්න අපිට හෂිනි මිස් හරියට සහාය වුණා. වික්ටර් රත්නායකයන්ට හරි හරියට සත්කාර කරලා හැමෝටම ගීතය ගායනා කරන්න හොඳ මූඩ් එකක් හැදුවෙ හෂිනි මිස්. ප්‍රථම වතාවට මට තේරුණා වික්ටර් සර් හා හෂිනි මිස් ගැන සමාජය තුළ තිබුණු කතාව නෙමෙයි ඇත්ත කියලා. ඒ දෙන්නා අතර මොකක්දෝ මහා විශාල බැඳීමක් මා දුටුවා. ඒක වචනයෙන් විස්තර කරන්න බැරි එකක්.
මේක ප්‍රේම ගීතයක්, ඔබල‍ාගේ ජීවිතවලටත් සම්බන්ධද?
මේක මගේ, ඔබේ, වික්ටර් සර්ගේ අපි කාගේත් කතාව නේද?
අපේ හිතින් කවුරු හරි කැඩිලා බිඳිලා වෙන්වෙලා ගියොත් නැවත ආපහු ආවත් ඒ තත්ත්වය නැහැ නේද?
කැඩුණු වීදුරුවක් ආයෙත් පෙර විදිහට හදන්න කොහොමත් බැහැනේ. ඒ විදිහ තමයි සිතත්. ඒ විදිහට හැරදාලා ගිය කවුරු වුණත් ආයේ ආවට ඉස්සර තැන නැහැනේ.
ඩිල්ෂාන් පතිරත්න මේ ගේය පද රචනය ගැන අදහස් දක්වමින්
මේක අපි හැමදෙනාමගේම කතාව. අහිමිවීම, අතහැරීම බුදුදහමේදී අපට උගන්වන කාරණයක්. හිමිවීම තුල ඇති සතුටට යටින් ඇත්තේ අහිමි වීමේ වේදනාව.ඒක අපිට විතරක් නෙමෙයි සොබාදහමටත් එකසේ වලංගු දෙයක්.
වසන් වන සඳ වලාකුළකට
හඩාවැටුනට තාරකාවක් ආයෙ එන්නෙ නෑ
හිතින් යන අය අතින් අල්ලා
නවත්තන්නට බෑ
මෙතැනදී හඳ වලාකුලකින් වැසුන නිසා ඒ දුකට ඒ අහිමි වීමට කඳුළු සලන්නේ තාරකාවක්. ඒ සඳ අහිමි වීම දරාගන්න බැරි නිසා.
මවාදී තරු රටා අහසේ
සිනාසී උන් තරු කිනිත්තෙන්
මලානික වූ පුංචි තරුවක්
පොලෝ තලයට කඩාවැටුනා
සරා සඳකට දරාගන්නට බෑ
හිතින් යන අය අතින් අල්ලා
නවත්තන්නට බෑ
දෙවැනි කොටසින් අර පලමුවෙන් කියපු කතාවේ අනිත් පැත්ත පෙන්වනවා. තරු රටා මවලා පුංචි පුංචි ඉද්ද මල් වගේ මුළු අහසම ලස්සන රටාවලින් හැඩ කරපු තාරකා ගොන්නෙන් එක තරුවක් කඩා වැටෙද්දී මේ වෙන්වීම, මේ හැරයාම සඳට දරා ගන්නට බෑ. තරුවේ වෙන්වීමේ විප්පයෝගයෙන් සඳ තනිවෙනවා රහසේම හඬනවා.
මේ ගීතයේ විශේෂත්වය වන්නේ අන්න එයයි.අහිමි වීම සහ අත් හැරීම කියන්නේ අපි සියළුම දෙනාගේ සදාතනික උරුමයන් බවයි.
ගීතයේ අවසාන කොටස ගැන කියන්න කලින් ඩිල්ෂාන් ඔහුගේ පෞද්ගලික අත්දැකීමක් විස්තර කලා.
"වෘත්තීමය නිතීඥයෙකු විදිහට මම වැඩියෙන්ම කතා කරලා තියෙන්නෙ දික්කසාද නඩු දවසක් මම මගේ හිතවතෙකුගේ දික්කසාද නඩුවකට පෙනී සිටියා.නඩුව අවසානයේ මම ලඟට ආ හිතවතා මෙහෙම කිව්වා මේ දේවල් අපේ කෙනාටත් කියන්න වෙයි.මෙතැනදී ඔහු අපේ කෙනා කියලා හැදින්වුයේ ඔහු දික්කසාද කල බිරිඳවයි මම මගේ හිතවතාට මෙහෙම කිව්වා. අද දහවල් 1න් පස්සේ අපේ කෙනා කියලා කෙනෙක් නෑ. ඒ කතාවට ටික වේලාවක් කල්පනා කරපු ඔහු,ඊලඟ මොහොතේ ඇස්දෙකේ කඳුළු පුරවාගෙන අඬන්නට ගන්නවා.."
නිවීයන තරුවක කතාවේ
බිදීගිය මතකයේ සැමරුම්
හිතේ ගැඹුරම තැන තියාගෙන
ආදරේ ඉකිබිදුම් ඇසුනා
මලානික ඇස් හිනාවෙන්නේ නෑ
හිතින් යන අය අතින් අල්ලා නවත්තන්නට බෑ
අපි අපේ ජීවිතයේ ඇති තරම් සම්බන්ධතා තුල වෙන්වීම් සහ හැරයාම් සිදුවීම් වෙන්න ඇති. නමුත් ඒ වෙන්වීම සිදුවන මොහොතේ අපිට දැනෙන අපිට හිතෙන ඔහු හෝ ඇය සමඟ බැඳුනු අතීත සැමරුම් සහ මතක වෙන්වූ පසු අපිව අවුස්සනවා, වද දෙනවා. එතැනදී අපි හැමොම අඬනවා වෙන්වීමක ආරම්භයේදී හැම දෙනාගේම සිත් තුලින් මතකයන් එක්ක විප්පයෝගයක වේදනාව උපදිනවා.
මේ කාරණාව ගැහැනු පිරිමි දෙපක්ෂයටම පොදුයි. හැමදෙනාගේම මතක තුල අපිට අඬන්න හිතෙන තරම් දුක වෙන්වීමක් තියනවා.
(උපුටා ගැනීම - සිළුමිණ)
