ශිල්ප සොඳින් දැනගන්න ගිහින් නුඹ
යහතින්දෝ කොළොම්පුරේ
ඉන්න නොවේ මියැදෙන්න හිතයි මට
නුඹ නැති හන්දා මං තනියේ //
හැන්දෑ අවරට දැක්කද නංගෝ
තුරුළු වෙලා ඉන්නා ජෝඩූ
රංචු මිසක තනියෙන්ම නොයන්නේ
ඒ නුවරට උඹ කිරිකෝඩූ
ශිල්ප සොඳින් දැනගන්න ගිහින් නුඹ . . . . .
නාමල් සුවඳක් පෙරදා වාගේ
අද නැහැ නොවැ ඇළ ඉස්මත්තේ
නාමල් සුවඳට බඹරු ඇදේදෝ
මගතොට නුඹ යනෙනා වාරේ
ශිල්ප සොඳින් දැනගන්න ගිහින් නුඹ
ගායනය - සුනිල් එදිරිසිංහ
පදරචනය - වසන්ත කුමාර කොබවක
සංගීතය - වික්ටර් රත්නායක
ශිල්ප සොඳින් ගීතය ලියවුනේ කෙසේද යන්න වසන්ත කුමාර කොබවක පැහැදිලි කරමින්....
මං ඔය කිව්ව ගමේ මතකය වගේම සරසවියේදී මං දකිනවා තවත් පේ‍්‍රම වෘතාන්ත. මගේ මිතුරෙක්, මිතුරු වෙනවා කලා පීඨයේ සොයුරියක් එක්ක. නමුත් අපි දැනගන්නවා ඇයගේ පෙම්වතා ගමේ ඉන්නේ කියලා. දෙන්නම කියන්නේ මේක මිතුරුකමක් කියලා. මිතුරුකමට එහා ගිය පේ‍්‍රමයක් දළුලන බව අපට පෙනුනා. ගමේ පෙම්වතා එනවා සමහර නිවාඩු දවස්වල ඇය හම්බවෙන්න. අර මගේ මිත‍්‍රයා බොහොම පරිස්සමින් තමයි කටයුතු කරන්නේ ගමේ පෙම්වතාට නොදැනෙන්න. නමුත් කාලයක් යද්දී මේ දෙන්න ගේ පේ‍්‍රමය දියුණුවෙලා අර ගමේ පේ‍්‍රමය නැතිවෙලා යනවා. ඔය සංසිද්ධිය තමයි ශිල්ප සොඳින් දැනගන්න ගිහිං ගීතයට ප‍්‍රස්තුත වුණ කාරණාව.
(උපුටා ගැනීම - යුගන්ති යශෝධරා)
