මේ ලෝකයේ..
සෑමා රසේ..
මූණේ ඔබේ...
බිළිදු පුතේ මගේ...
බිළිදා නැලවේ උකුලේ
හිනැහේ මලසේ කැකුලේ
මවගේ සෙනෙහේ පැතිරේ
රුධිරේ කිරිවේ ඉතිරේ
දෝත නගා මොළවා
සුර ලාළනියෝ ඒලවා
ගීත අසා මවගේ
නොදොඩා නොහඩා හිනැහේ
පාද ගසා නටලා
බිළිදා මතුවේ මිනිසා
ලෝ දහමේ නගිනා බසිනා
දුක සැප අතරේ වසනා
සෑමදෙනා කැදවා
පොදු අාදරයේ රදවා
මූණ බලා සැමගේ
නොදොඩා නොහඩා හිනැහේ
ජීවිතයේ සිහිනේ
සැනසීම තිබේ මුහුනේ
මෑණී පියා දෙදෙනා බදිනා
නිවසේ පහණයි බිළිදා
බිළිදා නැලවේ උකුලේ
හිනැහේ මලසේ කැකුලේ
මවගේ සෙනෙහේ පැතිරේ
රුධිරේ කිරිවේ ඉතිරේ
පදරචනය - ඇලන්සන් පියදාස
ගායනය - සී.ටී. ප්‍රනාන්දු
සංගීතය - සී.ටී. ප්‍රනාන්දු
සී.ටී.ප්‍රනාන්දු මහතාට 1951 වසරේ ධනා නම් තම ගීතවලට පෙම් බැඳි රසිකාවක් හැඳින ගැනීමට ලැබිණි. බදුල්ලේ උපත ලැබූ ධනා බදුල්ල උසස් බාලිකා විද්‍යාලයේ ඉගෙනගත් 17 හැවිරිදි තරුණියකි. ඇය ගුවන් විදුලියෙන් නිතර ඇසෙන පින් සිදුවන්නේ බාල ළමුන්නේ නම් සී.ටී. ගේ ගීතයට තිබූ අසීමිත කැමැත්ත නිසා රසිකාවියක් ලෙස ලිපියක් යැව්වාය. ලිපියට ඔහුගෙන් පිළිතුරු ලැබිණි. ධනාට මෙය කප්රැකක් පහළ වූවා සේය. ඇය ආදරය සෙනෙහස මුසු කළ පිළිතුරු ලිපියක් යැව්වාය. මේ ලිපි හුවමාරුව ආදරයකට පෙරළිණි. ඇගේ දෙමාපියෝ මේ සම්බන්ධයට විරුද්ධ වූහ. 1951 වසරේ තනි කැමැත්තට ඔවුහු අතිනත් ගත්හ. ඔවුන්ට සහායට හිටියේ ගායිකා ලතා ප්‍රනාන්දු (පසුව වල්පොල) පමණි. ඔවුහු හැඳල පදිංචිව පසුව දෙහිවල ගෙයක් තනා පදිංචි වූහ. පවුලට අලුත් සාමාජිකයෙක් එක්විය. මේ බිළිඳු පුතාගේ නම ප්‍රියන්තය. සී.ටී. පුතා වෙනුවෙන් ගීයක් ඇලන්සන් පියදාස ලවා රචනා කර ගත්තේය.
මේ බිළිඳා නැළවේ ගීතයේ හරිම අපූරු කතාවක් තියෙනවා. මෙහි ආරම්භයේ තියෙනවා කුඩා දරුවෙක් හඬන ශබ්දයක් ඔබට ඇහෙනවා. ඒ දිනවල සී.ටී. මහතාගේ මේ ගීතය පටිගත කිරීම සඳහා එල්.ආර්.එන්.එච්. පෙරේරා මහතා කටයුතු කරනවා. මෙයට දරුවෙක් අඬන ශබ්දය ඇතුළත් කරන්න එතුමාට අවශ්‍ය වෙලා තිබුණා. ඉතින් දවසක් එතුමා කෙටි විවේකයකට ලංකා ගුවන් විදුලියේ සිට තමන්ගේ පාගොඩ පිහිටි නිවසට පැමිණි පසු පාරේ ඒ අවස්ථාවේ කිරි විකුණන පුද්ගලයෙක් ගිහින් තියෙනවා. එවිටම පෙරේරා මහත්මයාගේ සිඟිති දියණියක් හඬා තිබෙනවා. ඒ හඬ ඇසුණු කිරිකාරයාත් බිළිඳු හඬ අනුකරණය කරමින් "ඔහෑ...." යනුවෙන් හඬා තිබෙනවා. ඒ ඇසුණු වහාම පෙරේරා මහතා, "තව ගෙවල් කිහිපයකට කිරි විකුණන්නට තියෙනවාද? ඉක්මනට ගිහින් එන්න. මාත් එක්ක Radio Ceylon එකට යන්න තියෙනවා" යනුවෙන් පවසා ඔහුව රැගෙන ගොස් බිළිඳු හඬ පටිගත කරගෙන තියෙනවා. පසුකාලීනව මේ පුද්ගලයාට ගුවන් විදුලියේ ළමා වැඩසටහන් වල විවිධ හඬ අනුකරණයේ යෙදෙන්නට අවස්ථාව ලැබී තිබෙනවා. "පෙත්තප්පු" යන අන්වර්ථ නාමයක් මේ පුද්ගලයාට පසු කාලීනව ලැබෙනවා. පෙරේරා මහතා පසුකාලීනව මේ පුද්ගලයාට රැකියාවක් පවා ලබා දී තිබෙනවා.
(උපුටා ගැනීමකි)
