ධර්මදාස වල්පොල නම් අසහාය ගායකයාණන් අභාවප්‍රාප්ත වී දෙසැම්බර් 25 වන අද දිනට වසර 37 කි. එතුමා 1983 දෙසැම්බර් 25 වන නත්තල් දින අප අතරින් සමුගන්නා ලදී. එතුමා විසින් ගායනා කරන ලද පළමු චිත්‍රපට ගීතය ඔහුට උපහාර පිණිස අද දින ඉදිරිපත් කරමි.
හොඳ හොඳම වේය ලොව
කිසිම තැනක නැහැ
නොහොඳ නරක දිණුවේ
සිත ඊර්ෂ්‍ය මාන ගති
නැති නිසාම අපි
ප්‍රේම තරඟෙ දිණුවේ ...//
බොහො ප්‍රේමෙ පුෂ්ප වියළේ
මව් පියගෙ ප්‍රේමෙ සුදිලේ
ලොව සැමට ශාන්ති සදනා
මධුර සුපිරිසිදු රම්‍යාවූ පෙම් ....//
හොඳ හොඳම වේය ලොව
කිසිම තැනක නැහැ
නොහොඳ නරක දිණුවේ
සිත ඊර්ෂ්‍ය මාන ගති
නැති නිසාම අපි
ප්‍රේම තරඟෙ දිණුවේ
මා ජීව අර්ධෙ ස්වාමී ස්වාමී
මා ජීව අර්ධෙ ප්‍රේමී ප්‍රේමී ...//
මල්සරා මගේ ප්‍රේමා ප්‍රේමා
මා පතිනි පියුම් කාන්තා දේවී
ලොව සැමට ශාන්ති සදනා
මධුර සුපිරිසිදු රම්‍යාවූ පෙම්
ලොව සැමට ශාන්ති සදනා
මධුර සුපිරිසිදු රම්‍යාවූ පෙම්
හොඳ හොඳ ම වේය ලොව
කිසිම තැනක නැහැ
නොහොඳ නරක දිණුවේ
සිත ඊර්ෂ්‍ය මාන ගති
නැති නිසාම අපි
ප්‍රේම තරඟෙ දිණුවේ
හොඳ හොඳ ම වේය ලොව
කිසිම තැනක නැහැ
නොහොඳ නරක දිණුවේ
සිත ඊර්ෂ්‍ය මාන ගති
නැති නිසාම අපි
ප්‍රේම තරඟෙ දිණුවේ
ගායනය - ලතා වල්පොල සමග ධර්මදාස වල්පොල
පද - හියුගෝ ප්‍රනාන්දු
තනුව හා සංගීතය - ආර්. මුත්තුසාමි (සිංහල සිනමාවට මොහුගේ ප්රථම දායකත්වයයි)
1953 දී තිරගතවූ "ප්‍රේම තරඟය" චිත්‍රපටියේ ගීයකි.
ලතා, ධර්මදාස වල්පොල සමගින් චිත්‍රපටි යුග ගී ගායනයකට එක්වූ ප්රථම අවස්ථාව "ප්‍රේම තරඟය" චිත්‍රපටිය වේ. එපමණක් නොව ධර්මදාස වල්පොලගේ ප්රථම සිනමා පසුබිම් ගායනය ද එක්වන්නේ "ප්‍රේම තරඟය" චිත්‍රපටියටයි.
(ධර්මදාස වල්පොල ලතා සමඟ විවාහ වන්නේ පසු කලෙකයි. මේ අවධියේ ලතා, ලතා වල්පොල නොව, මාතරගේ රීටා ජෙනිවිව් ප්‍රනාන්දුය. කලා ක්ෂේත්‍රයට ඇගේ නම ලතා ලෙස යෝග්‍ය බව කියා ඒ නම ස්ථාපනය වන්නේ සුසිල් ප්‍රේමරත්නයන්ගේ යෝජනාවකිනි.)
ප්‍රේම තරඟය චිත්‍රපටියේ සංගීතය වෙනුවෙන්, ඉන්දීය පත්‍ර කලාවේදීන්ගේ සංගමය, මුත්තුසාමි මහතා සම්මානයකින් පිදූ බව වාර්තාවේ. මෙම චිත්‍රපටියේ සියලු ගී තනු ස්වතන්ත්‍ර නිර්මාණ වේ.
මෙම ගීතය රචනා කර තිබුණේ හියුගෝ ප්‍රනාන්දුය. සංගීතය ආර්. මුත්තුසාමි මාස්‌ටර්ය. ඒ. බී. රාඡ්. අධ්‍යක්ෂණය කළ එස්‌. එම්. නායගම් නිපදවූ "ප්‍රේම තරඟය" චිත්‍රපටිය වෙනුවෙනි. මෙම ගීතය මුලින්ම ගායනා කරන්නට නියමිතව සිටියේ ධර්මදාස නොවීමද අපූරු කතාවකි. එය ගයන්නට සිටි අරුණ ශාන්ත නම් චිත්‍රපට නළුවා හදිසියේ අසනීප තත්ත්වයට පත්වීම නිසා චිත්‍රපට කණ්‌ඩායමට විශාල ප්‍රශ්නයකට මුහුණ දෙන්නට සිදුවිය.
මුත්තුසාමි මාස්‌ටර්ගේ වාදක මණ්‌ඩලයේ තබ්ලා වාදනය කරමින් සිටි එම්. ආරියදාස ගැටලුවට විසඳුමක්‌ ලබා දුන්නේය. මාස්ටර් හොඳට සිංදු කියන්න පුළුවන් හාදයෙක්‌ ඉන්නවා. රේඩියෝ සිලෝන් එකෙත් "ලයිව් සෝන්ග්ස්‌" කියනවා.
කවුරු වුණත් කමක් නැහැ. ඉක්‌මණට එක්ක එන්න. එවර කථා කළේ චිත්‍රපටියේ නිෂ්පාදක නායගම්ය. ආරියදාස හනි හනික කඳානේ සිට බස්‌රියක නැඟී මරදානේ සිටි ධර්මදාස සොයා ගියේය. වාසනාවකට ඔහු ගෙදර සිටියේය. "ධර්මෙ ඉක්‌මණට ඇඳ ගන්න. පොඩි වැඩකට කඳානට යන්න තියෙනවා." ආරියදාස කීවේය. මිතුරාගෙන් ආගිය කාරණා නොවිමසා කඳානට ගියේය. එදා ධර්මදාස චිත්‍රපටයකට ගීයක් ගැයීය. එය යුග ගීතයකි. ඔහුගේ සහාය ගායිකාව වූයේ ලතා ජෙනට්‌ ප්‍රනාන්දුය. ඒ අපූරු ගීතය විය. ලතා ධර්මදාසගේ කටහඬ රන් රස සේ පෑහිණ. 1953 ධර්මදාස වල්පොල චිත්‍රපට ගීත ගායනයට අවතීර්ණ වන විට වයස අවුරුදු 26 කි.
(උපුටා ගැනීම - දිවයින/ ගී අරණ)
