රණට පැහෙන රන්වන් කෙත මැද්දෙ මේ, දුනුකෙයියා මල සේ රං මැණිකේ මගේ
ආදරේ මැණිකේගේ ආදරේ..//
සිහින මල් පිපි සැලේ
සිනිදු සේලයන් දිගේ
පා තබා කොහේද යන්නෙ
මැණිකේ මේ උදේ
ආදරේ මැණිකෙගේ ආදරේ
අතට ගිගිරි වළලු මිනි කිකිණි නාද දේ
ඒ හඬින් සැලේවි මිහිර මහද ආදරේ
ආදරේ මැණිකෙගේ ආදරේ
කෙතක මහිම දුටුවා නිල් ගොයම හා දිලි
වතක මහිම දුටුවා නෙත් යුවල හා වෙලී
ආදරේ.
ආදරේ මැණිකෙගේ ආදරේ
ගායනය - එච්.ආර්. ජෝතිපාල
පදරචනය - ප්‍රේමකීර්ති ද අල්ව්ස්
ඒකනායක මුදියන්සේලාගෙ කොයින් මැණිකේ කොත්මලේ පදිංචිකාරිනියක්. විවාහක කාන්තාවක වූ මැනිකේ එච්.ආර්. ජෝතිපාලයන්ගෙ කට හඬට වශිවෙලා හිටියේ. ඒ වනවිට පිරිමි දරුවන් තුන් දෙනෙක්ගෙ මවක් වූ කොයින් මැණිකෙ දරුවන් ඉන්න කාන්තාවක් යැයි කිව නොහැකි තරමේ සුන්දර රූ සපුවකින් යුතු යොවුන් විනෝදකාමි කාන්තාවක් වූවාය. අතිතයේ දවසක කොළඹ පැවති සංගීත සංදර්ශණයක් නරඹන්න කොයින් මැණිකේ ගොස් තිබුනේ එච්.ආර්. ජෝතිපාලගේ ගැයුම් අහන්ටමය.
ඒ හදවත රත්තං ජෝති දකින්න ඔහුගෙ ගී අහන්න කොයින් මැණිකේ කොළඹ ගොස් තිබුනේ තමන්ගෙ කුඩා පිරිමි දරුවන් තිදෙනාද කැටුවමය. ප්‍රසංග වේදිකා භූමියේ අතුරු සිදුරු නැතිව පිරී තිබූ එදා පිරිස අතර තෙරපී වේදිකාව සමීපයට කෙසේ හෝ පැමිණි මැණිකේ ජෝතිපාල ගී ගයන අයුරු වශී වී බලා සිට ඇත. ඒ උත්තුංග දේහදාරි පුරුෂයා දෙස ඕ බලාසිට ගී ගයා වේදිකාවෙන් බසිනවාත් සමග දුවගොස් ජෝතිපාල අසල නැවති ඇත. සුරූපි නොනැසුන යෞවනය සහිත මේ ගැහැණිය දුටු මොහොතේම එච්.ආර්. ජෝතිපාලගෙ ඇසද ඈ අසල නැවති ඇත. දෛවයේ ඒ මුන ගැස්සීම එක වහලක්‍ යට පවුල් කන තැනටම දුර දිග යන්ට වැඩි කලක් ගත නොවිය .
මේ ප්‍රේම සබඳතාවට පැවති බාධක හෝ මේ ප්‍රේමය නිසා හටගත් බාධක ජෝති - මැණිකේ යුවල තඹයකට නොසලකා තිබිණ. එවකට ජෝතිපාල විවාහවී දියණියන් සිව් දෙනෙකුගෙ පියෙකු වී සිටි අතර එය හෝ කොයින් මැණිකේ විවාහවී පිරිමි දරුවන් තිදෙනෙකුගෙ මවක්ව සිටීම යන කිසිවක් මේ පෙම් කතාවේදි ඔව්හු බාධාවක් කරගෙන නොතිබිනි.
එච්.ආර්.ජෝතිපාල තමන් පදිංචිව සිටි මාලිගාවත්ත මහල් නිවාස සංකීර්ණයේ නිවස අතැර කොයින් මැණිකේ සමග කොත්මලේ පදිංචියට ගොස් ඇත.ඉතා කෙටි කලකින් කොයින් මැණිකේද කැටුව මාලිගාවත්තද ජෝති පැමිණ තිබේ. පසුව කඩිනම් මහවැලි ව්‍යාපෘතියට කොයින් මැණිකේගෙ කොත්මලෙ ඉඩම රජය පවරා ගැනීමත් සමග ඒ වෙනුවෙන් ආනුරාධපුර තබුත්තේගමින් මහවැලි කුඹුරු ඉඩමක් කොයින් මැණිකේට හිමිව ඇත.
තඹුත්තේගමදී මැණිකේ සමඟ ජීවත් වූ කාලයෙ ඔහුගෙ කාර් එකේ පිටුපස සුමිතුරෝ චිත්‍රපටයෙ ප්‍රචාරක දැන්වීමක්ද අලවා තිබී ඇත. මැණිකේ සමඟ ගොවි ගම්මානයක ජෝති ගතකල ප්‍රේමවන්ත ජීවිතය හා මැණිකේගෙ ආදරය හේතුවෙන් ඒ අරඹයා ජෝතිගෙ හඬින් ගැයුන කදිම ගී ගොන්නක්ම සිංහල ගී ප්‍රේමීන්ට ඉතිරි වී තිබේ.
ප්‍රේමකීර්තිද අල්විස්ට කියා රචනා කරවා ගෙන මැණිකේ ගැන එච්.ආර්.ජෝතිපාල ගැයූ ‘ආදරේ මැණිකේගෙ ආදරේ ගීතය ආරම්භ වන්නෙ සංගීත ආරම්භයට ප්‍රථම කවි ස්වරයෙන්
“රණට පැහෙන රන්වන් කෙත මැද්දෙ මේ, දුනුකෙයියා මල සේ රං මැණිකේ මගේ’ ලෙසය.
එකල ප්‍රසංග සඳහා ජෝති මැණිකේද කැටුව ගොස් ඇති බැවින් ද කලක් මැණිකෙ සමග මාලිගාවත්ත මහල් නිවාසයේද මැණිකේ ජීවත්ව ඇති බැවින් බොහො විට එකල ප්‍රේමකිර්තිද අල්විස් සියැසින් මැණිකේ දැක තිබෙන්නට ඉඩ තිබේ. ජෝති මැණිකේ ප්‍රේමය ගැන වැටහීමක් ප්‍රේමකීර්තිද අල්විස්ට තිබෙන්නට ඇත. ඔහු මැණිකේ ගැන ජෝතිට ලියා දෙන්නෙ මෙසේය.
“ආදරේ මැණිකේගේ ආදරේ..//
සිහින මල් පිපි සැලේ
සිනිදු සේලයන් දිගේ
පා තබා කොහේද යන්නෙ
මැණිකේ මේ උදේ
අතට ගිගිරි වළලු මිනි කිකිණි නාද දේ
ඒ හඬින් සැලේවි මිහිර මහද ආදරේ
කෙතක මහිම දුටුවා නිල් ගොයම හා දිලි
වතක මහිම දුටුවා නෙත් යුවල හා වෙලී
ආදරේ.
මැණිකේ ගේ ආදරේ “
ජොතී තඹුත්තේගම නිවසේ ඉන්නා දිනයන්හි ගමේ තරුණයන් හැන්දෑවේ එනිවසේ පැයක් හමාරක් ගත කරන්නට අමතක කර නැත. ජෝතී දකින්නට නිතර මේ නිවසට පැමිණ තිබේ. එයින් ජෝතිගෙ මේ නිවස ප්‍රකට වන්නට වැඩි කලක් ගොස් නැත.
ජෝති මැණිකේ යුග ජීවිතය ගත වූ හැටි සහ ජෝති කෙතරම් මැණීකෙට පෙම් කලාදැයි ජෝති මැණිකේ වෙනුවෙන් ගැයූ ගී ශාක්ෂි සපයයි. ඒ ගී එදාද අදද රසික ජනයාගෙ නොමද ආදරයට ලක්ව මුව මුව රැව් දුන්නද ඒවා ජෝති විසින් මැණිකේ සම්බන්ධයෙන් ගැයූ ලෙස පුද්ගලිකව දැකීමෙදි ඇතිවන හැඟීම සපුරා වෙනස්‍ ය.
ජෝති මැනිකේ ආදර කතාවේ නොරිස්සුම් සහ සිත් රිදීම් රැසක් තිබෙන්ට ඇත. දෙදෙනාම වෙනත් විවාහයක සිට එක් වූවෝය. ජෝතිව නිත්‍යානූකූලමව තමන් සතු කරගන්ට ඇතැම් විට මැණිකේට අදහසක් තිබෙන්නටද ඇත.
එච්.ආර්.ජෝතිපාල හෙවත් මෙරට සංගීත ප්‍රේමීන්ගෙ හදවත රත්තරං ජෝතීගෙ හදවත සොරාගත් මැණිකේ ලඟ නතරව ජීවිතය මැණිකේ සමගම ගෙවන්නට වීමේ ආදරයෙ ප්‍රතිඵලය ලෙස ඔවුනට 1982 සැපතැම්බර් 15 වැනිදා කොළඹ සොයිසා රෝහලේදි දුවක ඉපැදින. ජෝති විසින් ඈට නම තබන ලද්දෙ මිහිරි නිසංසලා ජෝතිපාල ලෙසය. ජෝති මිහිරී දුවට අතිශය ප්‍රේමයෙන් සිට ඇත. එදවස අත තිබූ මුදල් යොදවා මිහිරි නිසංසලා දුව වෙනුවෙන් ජෝති බැංකු ගිණුමක්ද ආරම්භ කර ඇත. ජෝති “මගේ නිසංසලා දුවේ ,, ගීතයත්, “මිහිරි මිහිරි දුවේ මිහිරි” ගීතයත් ගායනා කර ඇත්තේ මිහිරි නිසංසලා දියණිය වෙනුවෙනි.
තම පෙම්බර මැණිකේගෙ පැරණි විවාහයෙ පුතුන් තිදෙනාටද පියෙකු වූ ජෝති ඔවුන්ගේ අධ්‍යපන කටයුතු වෙනුවෙන් අවශ්‍ය විය හියදම් දැරීම් ඉතා ඕනෑ කමින් සිදුකර තිබේ.
ජෝතිගේත් මැණිකේත් පෙම් කතාව පමණක් නොව ජීවිත කාලයද නිමාව ගොස් ඇත.ජෝතී මිය ගියදා තඹුත්තේගම සිට තනිව ජෝතිගෙ දේහය දකින්නට කොළඹට ගොස් ඇති මැණිකේට සෙනඟ පෝලිමේ සිට තප්පර කීපයක් දේහය දකින්නට පමණක් අවස්ථාව ලැබී ඇත. ජෝතී ගී ප්‍රේමීන් කිසිවෙක් නොදැන හුදකලාව ජෝතිගෙ පෙම්බරිය මැණිකේ ද මෙලොවින් නික්ම ගොස්ය.
“තාත්තා අම්මා වෙනුවෙන් ගැයූ අම්මා කැමතිම සිංදුව අජන්තා රණසිංහ මහත්තය ලියපු ‘නින්ද නේන රාත්‍රියේ. තාත්තා අම්මාට මැණිකේ කියනව වගේම කාන්ති කියලත් කතා කලා.
(උපුටා ගැනීම - අරුණ)
