දුවේ නුඹ මගෙ ප්රාණයයි
සැබෑ වුණ සුබ සිහිනයයි
සෙනෙහසින් කුලගෙට පියනගන්නේ
සනුහරේ අභිමානයයි //
මං මලක් ලෙස නුඹ නොහැදුවේ
පෙති හැලී පරවෙන නිසාමයි
දුක දිනා හිනැහෙන හැටි දුවේ
නුඹ දැන උගත් පාඩම තමයි
මිල මුදල නිල බල යා නොදෙයි //
කළ හොඳම විතරක් ඉතිරිවෙයි //
දුවේ නුඹ මගෙ...
අප මී මුතුන් මිත්තන් එදා
සිය ලේ කඳුළු දහදිය පුදා
පරපුරෙන් පරපුරට රැගෙන ආ
ඒ ගෞරවය මගෙ දුව තමා
නුඹ යන්නෙ හිස් දෑතින් නොවේ //
ගෙනියන්නෙ ඒ අභිමානයයි //
දුවේ නුඹ මගෙ...
ගායනය - සුනිල් එදිරිසිංහ
පදරචනය - බණ්ඩාර ඇහැලියගොඩ
සංගීතය - ආචාර්ය රෝහණ වීරසිංහ
දියණියකගේ විවාහ උත්සව ආශ‍්‍රිතව වැඩි ගීත ප‍්‍රමාණයක් බණ්ඩාර ඇහැලියගොඩ රචනා කර තිබෙනවා. ඒ අතරින් සුවිශේෂීම ගීතය වන "දුවේ නුඹ මගේ ප්රාණයයි" ගීතය පිළිබඳව බණ්ඩාර ඇහැලියගොඩයන් අදහස් දක්වමින්.....
විවාහ උත්සව වලට වැඩිම ගීත ගණනක් ලියන්න ඇත්තේ මම වෙන්නැති. පළවෙනියට ලිව්වේ ”දුවේ නුඹ මගේ ප්රාණයයි”. ඒක ලියන්න හේතු වුණේ සැම්සන් සමූහ ව්‍යාපාරයේ අධ්‍යක්ෂවරයෙක් වන නන්දදාස රාජපක්ෂ මහතා කරපු ඉල්ලීමක් නිසා. ඔහු මට කිව්වා ඔහුගේ දුවගේ විවාහ මංගල්‍යය උත්සවය පැවතුණා ලොකුවට. එහිදී එක එක ගීත අහන්න ලැබුණා. ඒ ඔක්කොම අඳෝනා වගේ. මේ දුක කියන්නේ නැතිව අපිට බැරිද දුවෙක් කියලා කියන්නේ පරම්පරාවක අභිමානය කියලා හිතෙන විදිහේ ගීතයක් ලියන්න කියලා මගෙන් ඇහුවා.
ඔය අදහස වචන වලට පෙරළද්දී මගේ හිතට ආව පළවෙනි දේ තමයි ඉස්සර අපේ ගම්වල මඟුල් ගෙදරකදී කටයුතු ඉවරවෙලා යන්න ලෑස්ති වුණහම තියෙනවා පොඩි උත්සවයක් දෙපැත්තේම කට්ටිය එකතු වෙලා ගාථා ශ්ලෝක කවි කියලා ජීවිතේ ගෙවන්නේ මෙහෙමයි කියලා අවවාද අනුශාසනා සමූහයක් දෙනවා. මට ගීතය ලියන වෙලාවේ හිතුනා මේක ඉතා හොඳ අවස්ථාවක් දුව පිළිබඳව කියන්න. දුව චාරිත‍්‍ර ඉවරවෙලා පිටත්වෙන වෙලාවට තාත්තා කෙනෙක් තුළ ඇතිවන හැඟීම. ලියලා පළවෙනි වතාවට මං ඒක නන්දදාස මහත්මයට යැව්වාම එතුමා හරියට සතුටට පත්වෙලා මේක අපි ඉක්මනින්ම පටිගත කරන්න ඕන කිව්වා. සංගීතය රෝහණ වීරසිංහයන් නිර්මාණය කරලා සුනිල් එදිරිසිංහ ගීතය ගායනා කළා. ඒ කියපු දවසේ ඉඳන් අද දක්වාම සෑම මඟුල් ගෙදරකම පාහේ මේ ගීතය ගායනා වෙනවා. ඒක මට හරි සතුටක්.
ඊට පස්සේ ගීත ගණනාවක් දුවලා පිළිබඳ ලියවුණා. "අතිනත අරං යනවිට සෙමෙන් නව නෑ සියන් සමගින්" මෙම ගීතය සංඛනි එදිරිසිංහ ගායනා කරන්නේ. තව ගීතයක් සුනිල් එදිරිසිංහ ගයනවා පුතා ගැන "නුඹ වන් පුතෙක් ලද මවක් වේ නම් ඇයද සැනහේ මැයි, නුඹ වන් පුතෙක් ලද පියෙක් වේ නම් ඔහුද සැනහේ මැයි" කියලා.
(උපුටා ගැනීම - යුගන්ති යශෝධරා / මීවිත)
