වලා අතුල සිරියහනේ
උණුසුම් හිරු කෙඳි පොරවා
ඉන්ද්රචාප කුමාරයා
නිදා වැටෙනවා
මල් සුගන්ධයෙන් නැළැවෙන
ලතා මඬුල්ලේ ලැගගෙන
රෑන් රෑන් සියොතුන් ගී
සින්දු කියනවා
ජීවිතය වගේ මුමුණන
ආදරය වගේ දිලිහෙන
දිය තරංග පොකුරක්
එළියෙන් නලියනවා
නොදරුවෙකු අතින් බොඳවුන
සිතුවමක් ලෙසින් සුන්දර
පාට රෑනකින් දස අත
රටා වියනවා
කිරිවැදී නටන ගොයමට
මිහිදුමින් වැටුනු පිණිකැට
රන්දමක් වගේ ගෙල වට
රනින් දිළෙනවා
හෙටක් ගැන යමක් නොදකින
හෙටක් තිබේ දැයි නොසිතන
කෙනෙක් මධුවිතක් තොල් අග
තවරගන්නවා
වලා අතුල සිරියහනේ
උණුසුම් හිරු කෙඳි පොරවා
ඉන්ද්රචාප කුමාරයා
නිදා වැටෙනවා
මල් සුගන්ධයෙන් නැළැවෙන
ලතා මඬුල්ලේ ලැගගෙන
රෑන් රෑන් සියොතුන් ගී
සින්දු කියනවා
ගායනය - අමරසිරි පීරිස්
පද රචනය - සුනිල් රත්නායක
තනුව - ආචාර්ය ප්රේමසිරි කේමදාස
දළ රළ පෙළ ටෙලි සිතුවමෙන්
සුමිත්රා රාහුබද්ධ මහත්මියගේ ජනප්රිය නවකතාවක් වුණු දළ රළ පෙළ නවකතාව ඇසුරෙන් නිර්මාණය කළ ටෙලි නාට්යය පිළිබඳව මතකය තවමත් අපේ ප්රේක්ෂකයා තුළ රැඳී තිබෙනවා. ඒකට එක හේතුවක් වන්නේ “වලා අතුල සිරි යහනේ” ටෙලි නාට්ය තේමා ගීතය. ඊට අමතරව එහි ප්රධාන චරිත නිරූපණය කළ සොමී රත්නායක සහ සමිතා එරන්දතී මුදුන්කොටුවගේ රඟපෑම. ගැමි පරිසරයක උපත ලබන තරුණියක් තමන් මෙහෙකාරියක ලෙස සේවය කිරීමට පැමිණි නිවසේ ස්වාමියා සමඟ ඇති කරගන්නා සම්බන්ධතාවයක මානුෂික ස්වරූපය මේ ටෙලි නාට්යය තුළින් කතාබහට ලක් වුණා.
අපූර්ව සංගීතයකින් හා සිත ස්පර්ශ කරන අයුරින් කරන ගායනය සඳහා සරල බසින් මෙම ගීතය රචනා කර තිබෙන්නේ ටෙලිනාට්යය නිෂ්පාදනය කල ටෙලිවිව් ආයතනයේ අධිපති සුනිල් රත්නායක මහතා.
(උපුටා ගැනීමකි)
No comments:
Post a Comment