සුභ ප්‍රාර්ථනා කියමන්
සුභ ප්‍රාර්ථනා කියමන්
මා වටකර සතර දෙසින්
ගිලිහෙන මුත් මුවට මුවින්
ඔබේ මුවින් නැති පැතුමන්
මට නැත අගනේ
සුභ ප්‍රාර්ථනා කියමන්
සුභ ප්‍රාර්ථනා කියමන්
සුභ ප්‍රාර්ථනා
මා ඈ කර මාල බඳින්නේ
ඔබෙ නෙත් තරු සැලී දිළෙන්නේ
මා ඈ ගත සළු පළඳන්නේ
ඔබෙ නෙත් අග කඳුළු පිරෙන්නේ
ගිගුම් හඬින් මගුල් සිලෝ
පෝරුව දෙදරයි
සුභ ප්‍රාර්ථනා කියමන්
සුභ ප්‍රාර්ථනා කියමන්
සුභ ප්‍රාර්ථනා
මධුසමයට මඟට බහින්නේ
ඔබෙ නෙත් පෙර මඟ හමුවන්නේ
රහසින් බැඳි පෙම සිහිවන්නේ
අප මින් මතු නැත හමුවන්නේ
ඔබ අන්සතු ළඳක් කියා
ඇයි මට කීවේ
සුභ ප්‍රාර්ථනා කියමන්
සුභ ප්‍රාර්ථනා කියමන්
සුභ ප්‍රාර්ථනා
ගායනය - විශාරද ගුණදාස කපුගේ
පද රචනය - ලූෂන් බුලත්සිංහල
තනුව - විශාරද ගුණදාස කපුගේ
මෙම ගීතය පිළිබඳව පදරචක ලූෂන් බුලත්සිංහලයන් අදහස් දක්වමින් "මගේ සමීපතම මිත්‍රයෙක් හිටියා. එයා විවාහ වීමට පෙර විවාහක කාන්තාවක් සමඟ අනියම් ප්‍රේමයක් තිබුණා. ඔහුට ඇයව අයින් කරන්නම බැරි තැන වෙනත් කාන්තාවක් සමඟ විවාහ වුණා. එදා ඔහුගේ උත්සවයට පෙර කියූ අනියම් පෙම්වතියත් පැමිණියා.
මිත්‍රයාගේ අනියම් සම්බන්ධතාව දැනගෙන සිටි මමත් ඒ විවාහ මංගල උත්සවයට සහභාගි වුනා. ඒ මොහොතේ මගේ සිතේ ඇතිවුණ හැඟීම මං ‘සුබ ප්‍රාර්ථනා කියමන්’ කියන ගීතයෙන් ඉදිරිපත් කළා. මේ ගීතයේ තවත් විශේෂත්වයක් තියෙනවා. මගේ මිත්‍රයකු වුණ ගුණදාස කපුගේට මං ලියූ ප්‍රථම ගීතය වුණේ මේ ගීතයයි.
(උපුටා ගැනීමකි)
No comments:
Post a Comment