පාංකිරිත්තා තක්කිට තරිකිට උඩ පැන පැන නටතෙයි
පාංකිරිත්තී රබාන අරගෙන කරබාගෙන වයතෙයි
උන්ගේ පැටවුන් වටේට ඉඳගෙන දෑතින් හඬ තලතෙයි
මේවා බල බල තනි කෑඳැත්තෙක් කීචි බීචි කියතෙයි
පාංකිරිත්තා තමන්ගෙ පාඩුවෙ නැටුම පටන්ගත්තේ
අහල පහල කිසිවෙකුටත් ඒකෙන් හිරිහැරයක් නැත්තේ
කොහේද හිඳ පැමිණුනු කෑඳැත්තා වහලා අර අත්තේ
උන්ගෙ නැටුමට බාදා කරමින් ගීය පටන්ගත්තේ
පාංකිරිත්තා...
පාංකිරිත්තා නැටුම නවත්තා කේන්තියෙන් ආවා
කෑඳැත්තාගේ කළු අත්තටුවෙන් අල්ලා සෙලවූවා
ඊට පස්සෙ ඌ සට සට ගාලා මොන මොනවද කීවා
ළඟට කිට්ටු වී මා ද ගොළුවතින් ඊට සවන් පෑවා
අනුන්ගෙ වැඩ ගැන විවේචනය කර කර ඉන්නවට වඩා
තමන් දන්න දේ හරියට කරපන් කියලා කීය හඬා ///
ගායනය - ෆ්‍රෙඩී සිල්වා
සංගීතය - වික්ටර් රත්නායක
ගී පද - ප්‍රේමකීර්ති ද අල්විස්
ප්‍රේමකීර්තිට ඔහුගේ ලිවීමේ හැකියාව මෙන්ම නිවේදක හැකියාවත් ක්‍රමයෙන් දියුණු වීමත් සමඟම ඔහුගේ පළමු ගීපද රචනාව ලියන්නේ රූපා ඉන්දුමතී හා මල්කාන්ති නන්දසිරිටයි. ඒ ඔවුන් ගායනා කරන ‘හද පුද අසුනේ සෙනෙහස මැවුණා’ කියන ගීතයයි. 1969දි ප්‍රේම්ගේ කුළුඳුල් ගීපද රචනාව ලියැවෙන්නේ ඒ විදියටයි. ඒ වසරේ ම කේ.ඒ.ඩබ්ලිව්. පෙරේරාගේ ‘ලොකුම හිනාව’ චිත්‍රපටයට ප්‍රෙඩී සිල්වා ගයන ‘පරණ කෝට්’ ගීතයත් ප්‍රේම්ගේ අතින් රචනා වෙන්නේ ඔහුගේ පළමු චිත්‍රපට ගීතය බවට පත්වෙමින්. "ලොකුම හිනාව" චිත්‍රපටයට එච්.ආර්. ජෝතිපාලයන්ට ‘කැකුළු මලක’ ගීයද රචනා කොට ඇත. එසේ සිනමාවට ආ ප්‍රේමකීර්තිට එවක නැගී එන ගීත රචකයෙකු කැපිලි දමා තිබේ. හිතවත් සංගීතවේදියෙකු ලවා දමා ඇති එක් කැපිල්ලක් නිසා ප්‍රේම් එම සංගීතවේදියා සමග මිය යන තුරුම වැඩ කළේ නැත. එක් චිත්‍රපටයකට ඔහු ගීතයක් ලියූ විට අධ්‍යක්ෂවරයාත් සෑහීමකට පත්ව තිබියදී සංගීතවේදියා හතර පස් වතාවක්ම යළි යළිත් ලියන ලෙස කීම ගැන කෝප වූ ප්‍රේම් අන්තිම වතාවේ ගීතය ලියූ කඩදාසිය ඉරා වීසි කර ගෙදර පැමිණ තිබේ. එම කැපිල්ල දමන්නට සංගීතවේදියා පෙළඹවූ ගීත රචකයා නිතර අනුන්ව විවේචනය කරන්නෙකු ද විය. ප්‍රේම් ඔහුගෙන් නිර්මාණශීලීව පලිගත්තේ ෆ්‍රෙඩී සිල්වාට ‘පාන් කිරිත්තා’ ගීය ලියමිනි.
“අනුන්ගෙ වැඩ ගැන විවේචනය කර කර ඉන්නවට වඩා – තමන් දන්න දේ හරියට කරපන්…” කියා ප්‍රේම් ලියා ඇත්තේ ඔහුටය. ඔහු ජීවත්ව සිටියත් මළ සේය. ප්‍රේම් මළත් අදත් ජීවත් වන සේය.
හාස්‍යය හා උපහාසය මුසු ගීත කලාවේ පුරෝගාමියා ප්‍රේමකීර්ති ද අල්විස් මහතා වන අතර ඔහු විසින් උපහාසයේ හා අපහාසයේ වෙනස මැනවින් හඳුනාගෙන සමාජයට වටිනා පණිවුඩ ගීත රචනා හරහා ලබාදුන්නේය. ඒ සඳහා උපහාසාත්මක ගී ගායනයේ පුමුඛයා වූ ජනප්‍රිය විකට නළු හා ගායක ෆ්‍රෙඩ් සිල්වා යොදා ගෙන උපහාස ගීත කලාවක් බිහිකිරීමට මූලිකත්වය ගෙන කටයුතු කලේය.
