බැහැයි කියලා බැහැයි කියලා බෑ
බැහැයි කියලා බැහැයි කියලා බෑ
බෑ කියලා බැරිය මලේ බෑ කියලා
බැරිය නගේ
බැහැයි කියලා බැහැයි කියලා බෑ
මල් පිපුනේ සුවඳ දෙන්න බෑ යි කියල බෑ
තටු ලැබුණේ පියාඹන්න බෑ යි කියල බෑ
අත් ලැබුණේ වැඩ කරන්න බෑ යි කියලා බෑ
මේ ලෝකේ කිසිම දෙයක් බෑ යි කියලා බෑ
අපි හැදුනේ රට රකින්න බෑ යි කියලා බෑ
රට වෙනුවෙන් වැඩ කරන්න බෑ යි කියල බෑ
යුතුකම් ඇත ඉටු කරන්න බෑ යි කියල බෑ
නඟේ මලේ කිසිම දෙයක් බෑ යි කියලා බෑ’
ගායනය: "ලා තණකොළ පෙත්තාස්"
(දීපිකා ප්‍රියදර්ශනී පීරිස්,රසාදරී පීරිස්, රවීන්ද්‍ර මුණසිංහ සහ පිරිස)
පද රචනය: ප්‍රේමකීර්ති ද අල්විස්
තනුව හා සංගීතය: සෝමසිරි ඉලේසිංහ
අපේ ළමා කාලයේ රූපවාහිනියෙන් ප්‍රචාරය වූ දොස්තර හොඳ හිත සැකිලි රූ කතාංගයකට ප්‍රේමකීර්ති රචනා කළ “බෑයි කියලා බෑයි කියලා බෑ” ගීය රචනා කළ ආකාරය ගැනද අපූරු කතාවක් ඇත. මෙම වැඩසටහන් අධ්‍යක්ෂණය කරමින් මහඟු මෙහෙවරක් කළ ටයිටස් තොටවත්තයන් එකී කතාංගය සඳහා තේමා ගීයක් ලියන ලෙස ප්‍රේමකීර්තිට කියා ඇත. ටික කලක් ගත වුණත් ප්‍රේමකීර්ති අතින් යෝජිත ගීය ලිවීම අතපසු වී ඇත. දිනක් ප්‍රේමකීර්ති වෙත පැමිණි ටයි මහතා විසින් ටිකක් සැරෙන් “උඹට බැරි නම් බැහැයි කියපන්” යැයි ප්‍රේමකීර්තිට කියා ඇත. ප්‍රේමකීර්ති එකී ගීය පටන් ගෙන ඇත්තේ කනට ඇසුණ එම වචන කිහිපයෙන් ක්ෂණිකව ගීතය ලියා ටයිටන් තොටවත්තයින් වෙත ලබාදී ඇත.
ධනාත්මක චින්තයක් ගැන පැය ගණනක දේශනයකින් අත්නොවිඳින දෑ එම ගීතයෙන් උකහා ගත හැකිය.
මෙම ගීතයේ පදවැල් එකිනෙකට ගළපමින් ප්‍රේමකීර්ති ද අල්විස් නමැති දක්ෂ ගේය පද රචකයාත් එහි තනුව නිර්මාණය කළ ජාතික රූපවාහිනි සංගීත අංශයේ එවකට අංශ ප්‍රධානියා වූ සෝමසිරි ඉලේසිංහයනුත් දොස්තර හොඳ හිත කාටුන් චිත්‍රපට මාලාවේ මුල්ම කථාංගය වූ "බෑයි කියල බෑ" කථාව සඳහා අනුපමේය දායකත්වයක් ලබා දුන්හ. ප්‍රේම් මිය යන තෙක්ම ටයි මහතාගේ බඩ බැඳගත් එකම ගීත රචකයා විය. මා බඩ බැඳගත් යනුවෙන් විශේෂණ පදයක් ප්‍රේම් වෙනුවෙන් ලියා තබනුයේ ඔහු ටයි මහතා හමුවන සෑම විටකදීම පාහේ ටයි මහතාගේ ඉදිරියට නෙරා ආ බඩ වටා අත යවමින් බැරි බරගාතේ වුව ද ඔහුව තමන් දෙසට ඇද ගනිමින් තම දත් පෙළෙහි දෙපස පිහිටුවා තිබූ නල දත් දෙකම ප්‍රදර්ශනය වන සේ සිනහවීමට ප්‍රේම් පුරුදු වී සිටි බැවිනි.
දොස්තර හොඳ හිත කථා මාලාවට අන්තර්ගතව කාටුන් සංගීත කණ්ඩායමක් විය. ටයි මහතා විසින් එය නම් කරන ලද්දේ "ලා තණ කොළ පෙත්තාස්" යනුවෙනි. ප්‍රේම්ගේ පද්‍යවලට සෝමපාල රත්නායකගේ තනු වලට එම කණ්ඩායම් ගීත ගායනා කරන ලද්දේ දීපිකා පි‍්‍රයදර්ශනී ප්‍රමුඛ අතුල රන්සිරිලාල්ගේ කළුබෝවිල ගෝල බාල පිරිස විසිනි. දීපිකාගේ ප්‍රථම ගායන ප්‍රවේශය ද මෙය විය. පසු කලෙක දී ප්‍රාසංගික කලාව ජනතාව අතරට ගෙන යාම සඳහා රූප රචනාවෙන් සුරු විරුකම් පෑ රවීන්ද්‍ර මුණසිංහ ද එම ගායනා අත් වැලෙහි නිත්‍ය ගායකයෙකු විය.
(උපුටා ගැනීමකි)
No comments:
Post a Comment