පාරමිතා නොපුරමු අප දෙදෙනා
මතු මතු සංසාරේ...
පාන සිනා සුළඟට විසි කරමු...
හමුවෙන හැම වාරේ...
කඳුළුවලින් දියවී යනවා නම්
අවිහිංසක රූපේ...
දෝර ගලන තුරු කඳුළු සලන්නම්
මට ඔබ නොපෙනෙන සේ...
මට ඔබ ඔබ මට පෙම්කළ තරමට
වෙන්වී යන්න බැරී...
අසම්මතේ පෙම්වතුන් නොවෙමු අපි
වරදට වහල් වෙවී
ගායනය - ශෂිකා නිසංසලා
පදරචනය - ලලිත් වසන්ත
සංගීතය - ජයසිරි අමරසේකර
සංසාරය කියන්නේ කෙළවරක් නොදකින ගමනක්. මේ දිගු සසර ගමනේදී අප හැම කෙනෙක්ම එක් එක් ආත්ම භවයන්හි උපදිනවා. සමහර විට අද එකට එක්ව සිටින දෙදෙනෙක් ඊළඟ සංසාරයෙදීත් එකට එක්වෙනවා. ඒත් තවත් අයට සසරින් සසර එහෙම එක්වෙන්න ලැබෙන්නේ නැහැ. බොහෝ දෙනෙක් පෙරුම් පුරනවා. මීළඟ සංසාරෙදිත් අප එකටම උපදීවා කියලා.
පියාණෙනී, මා නැවත උපන්නොත් මේ සංසාරෙදී ඔබේම පුතු වේවා කියා සමහරු පවසන්නේ පියා කෙරෙහි තිබෙන දැඩි බැඳීම නිසාමයි.
සංසාරේ පැතූ පැතුම් නිමාකොට මෛත්රී බුදුන් දැක නිවන් මඟට එන දැන් මගේ සදාදර අම්මා ඔබම වේවායි පතන්නේ ඒ නිසාමයි.
ඔබ, මටම අයියන්ඩිය වී මා ඔබේ නැගණිය වී එකම මව් කුසයේ උපදින්නට අපි දෙදෙනාම පාරමී පුරමු යැයි සමහරු පතනවා.
මේ සංසාරෙදි එකතු වන්නට නොහැකි වූ පෙම්වතුන් පතන්නේ ඊළඟ සංසාරේදීත් අඩුම ගානේ සහෝදරයන් වී හෝ උපදීවා කියලා. සසරින් සසරට අපි දෙන්නා පෙම්වතුන් වී උපදීවා කියාත් සමහරු ප්රාර්ථනා කරනවා.
ඒත් මතු හැම භවයකදීම හමු නොවී ඉඳිමු යෑයි පෙම්වතෙකු ගෙන් ඉල්ලා සිටින්නට පෙම්වතියකට සිදු වේ නම්
පාරමිතා නොපුරමු අප දෙදෙනා
මතු මතු සංසාරේ
පාන සිනා සුළඟට විසි කරමු...
හමුවෙන හැම වාරේ...
අපි දෙන්නා මතු උපදින හැම භවයකදීම පාරමිතා නොපුරා ඉඳිමු. ඇය ඔහුගෙන් ඉල්ලා සිටිනවා. ඇය පවසන පාරමිතාව කුමක්ද... ඒ යළි යළි එකට එක්වේවා යන පැතුමයි. ඒත් ඇය කියා සිටින්නේ මතු මතු සංසාරවලදී අපි දෙන්නා එක් නොවේවා කියා... අපි දෙන්නා හමුවන හැම වාරයකදීම එකිනෙකා සමග සිනා නොවී ඉඳිමු. ඒ පාන සිනාවන් සුළඟේ ගසාගෙන යන්නට ඉඩ හරිමු. ඒ ඇයගේ ප්රාර්ථනාවයි.
මේ ගීයේ පද රචකයා ලලිත් වසන්ත. පද මාලාව ඉබේම සිතේ පිළිසිඳගත් බවයි ඔහු කියන්නේ.
මට මේ පද මාලාවට නිමිත්තක් නැහැ. නිකමට හිතට ආවා. මම ලියුවා. පද මාලාව දැකපු හැටිය ජයසිරි අමරසේකර සහෘදයා කිව්වා හරිම ලස්සනයි. මේක ශෂිකාගේ කැසට් එකට හොඳයි කියා.
කඳුළුවලින් දියවී යනවා නම්
අවිහිංසක රූපේ...
දෝර ගලන තුරු කඳුළු හලන්නම්
මට ඔබ නොපෙනෙන සේ....
ඇයට තවමත් ඔහු පෙනෙන්නේ අවිහිංසක ලෙසට. ඔයාගේ අවිහිංසක රූපය කඳුළුවලින් මැකිලා යනව නම්... මම දෝර ගලා යන තුරු කඳුළු හලන්නම්. එතකොට මට ඔබ නොපෙනී යාවි.
මේ දෙදෙනාගේ පෙම බිඳී ඇත්තේ කවර වරදක් නිසාද. සමහර විට ඔහු අහිංසකයි. ඔහුගේ වරදක් නොවේ. මේ ඇයගේ වරදින් සිදුවන වෙන්වීමක් විය හැකියි.
මට ඔබ ඔබ මට පෙම්කළ තරමට
වෙන් වී යන්න බැරී...
අසම්මතේ පෙම්වතුන් නොවෙමු අපි
වරදට වහල් වෙවී...
අපි දෙන්නා ඔයා මටත්, මම ඔයාටත් කොතරම් පෙම් කළාද අපි ආදරය කළේ කවදාවත් වෙන් වෙන්න බැරි විදිහට. ඒත් අද අපි වෙන් වෙනවා.
මේ සමුගැන්ම ඇය වෙනත් කෙනකු සමග අතිනත ගන්නා බැවින් විය හැකියි. වෙන්වී යන්න බැහැ. එත් අපි දෙදෙනාට ආයෙත් හමු වෙන්නත් බැහැ. වෙනත් කෙනෙකුගේ බිරිඳක් විදිහට මම කොහොමද ඔබව හමු වෙන්නේ... ඒක සම්මතයට විරුද්ධයි. අපි වරදට වහල්වෙලා. අසම්මත ආදරවන්තයන් නොවී ඉඳිමු. ඕ කඳුළු පිරි දෙනෙතින් ඔහුගෙන් දයාබරිතව ඉල්ලා සිටිනවා.
ගීතයේ පද මාලාවට සරිලන තනුවක් ජයසිරි අමරසේකර ශිල්පියාගෙන් ලැබී තිබෙනවා. ශෂිකා නිසංසලාගේ හෙළූ අහිංසක බව මේ ගීයට මනා ලෙස ගැළපෙනවා.
(අජිත් අලහකෝන් - දිවයින මීවිත)
