කැරකෙන රෝදේ...

කැරකෙන රෝදේ...ගීතය ලිව්වට ගුවන් විදුලි සංස්ථාවෙන් මට රුපියල් තිහක් ගෙව්වා....ඒ 1973 අවුරුද්දෙ ...

එහෙම කිව්වෙ මේ ගීතයේ ගේයපද රචකයා සිරිල් සමරකෝන් මහත්මයා...

මම 1972 ලංගම පත්වීම ලැබිලා මුලින්ම වැඩකලේ 134 - ගල්කිස්ස -  අංගොඩ පාරේ..දවසක් පිටකොටුවේ  කාර්මික  විද්‍යාලෙ හරියෙන් බස් එක යනකොට  විනාඩියකට වගේ බස් එක නැවැත්තුවා.එතකොට වැඩියෙන්ම තිබුනෙ ඩබල් ඩෙකර් බස්........ මම වැඩ කලේ උඩ තට්⁣ටුවෙ.පහල කොටසෙත් කොන්දොස්තර කෙනෙක් හිටියා.. ඒ නවත්තපු වෙලාවෙ මම දැක්ක උඩ ජනේලෙකින් ඒ කාර්මික  විද්‍යාල ඉස්සරහ පොඩි ලෑලි තට්ටුවකට රෝද හයි කරපු කරත්තයක මනුස්සයෙක්  ඉදගෙන ඉන්නවා...ඔහු ආබාධිත පුද්ගලයෙක්..කැඩුණ කුඩ දෙක තුනක්... සපත්තු කීපයක් තව පොඩි පොඩි ආම්පන්න  ටිකකුත් ඒක උඩ තිබුණා......සංවේදී ම දර්ශනේ තමයි ඒක තල්ලු කලේ අවුරුදු  දොළහක විතර පොඩි පිරිමි ලමයක්..ඒ දෙන්නත් එතන නැවතිලා හිට්යෙ..තාත්තයි පුතයි වෙන්න ඇති...ටික වෙලාවකින් අර වැඩිහිටි මනුස්සයා ඔලුව වනලා යන්...කියල අර දරුවට කිව්වා...... දරුවා අර කරත්තෙ තල්ලු කරන් යන්න පටන් ගත්තා. .......... .

මට ඒ සිද්ධියට පපුව පිච්චිලා යනවා වගේ දැනුනා..මට ගෙදර මතක් උනා ..අම්මා අප්පච්චි  මතක් උනා..මම නිකමට වගේ අතේ තිබුණ බස් ටිකට් අමුණල තිබ්බ කාඩ්බෝඩ් කෑල්ලෙ..

කැරකෙන රෝදේ පුංචි කරත්තේ

 ඉදගෙන මම ඉන්නෙ....

පදික වේදිකා පසුකර යන්නට

 තල්ලු කරන් පුතුනේ කියල  ලිව්ව..ඒක නිකංම ලියවුණේ..එදා ලිව්වෙ එච්චරයි. ඉතුරු ටික පස්සෙ දවසක ලිව්වෙ...

මම රත්මලානෙ ඩිපෝවෙ හිටියෙ ඒ දවස්වල..එහෙ නිතරම රේඩියෝව  දාලා තියෙන්නෙ.. . දවසක් ඒකෙ කිව්වා ගීත බැංකුවට අලුත් පදමාලා ගන්නවා.. එවන්න කියල..මමත් වැඩිය හිතුවෙ නෑ මේ ගීතය තැපැල් කලා..අවුුරුද්දක් විතර ගියාම මට ලිපියක් එවලා තිබුණා. ඔබේ ගීතය තෝරා ගත්තා.. අහවල් දවසෙ පටිගත කරනවා සහභාගි වෙන්න  එන්න කියලා..මමත් ගියා ඉතිං..ගීතය සංගීතවත් කලේ කලනි පෙරේරා... සරල ගී වැඩසටහනකට ගායනා කලේ එවකට නැගී එන ගායන ශිල්පියෙක් වුණ එඩ්වඩ් ජයකොඩි මහත්තයා. 

ඒ...ගේය පදරචකයාගේ...මතකය... 

කැරකෙන රෝදේ...පුංචි කරත්තේ..

ඉදගෙන මම ඉන්නේ..

පදික වේදිකා පසුකර යන්නට

තල්ලු කරන් පුතුනේ...  //

කැඩුන පාවහන් කුඩ නිමවාලා

දවසේ වියදම සරි කරවාලා..

අදුර වැටෙන්නට කලියෙන් ගෙදරට

තල්ලු  කරන් පුතුනේ .....//

කැරකෙන රෝදේ ...

කිරිකැටි දෙඅතේ සවිබල දියවේ

පමා උනොත් අප මහමග තනිවේ.. 

අම්මා  මග ඇති නෙත් දල්වාගෙන

තල්ලු  කරන් පුතුනේ ....//

පදරචනය  සිරිල් සමරකෝන් 

සංගීතය - කළණි පෙරේරා 

ගායනය - එඩ්වඩ් ජයකොඩි