ගාල්ල රිච්මන්ඩ් විද්‍යාලයෙන් උසස් පෙළ හදාරලා ඊට පස්සේ සමත් වෙලා ප්‍රායෝගික පරීක්ශනය වෙනුවෙන් ලැබුන නිවාඩු මාස තුනේ එක් තරා තරුණයෙක් යනවා නිවාඩුව ගත කරන්න මන්නාරම් දිස්ත්‍රික්කයේ සිටින ඥාතිවරයෙකුගේ ගෙදර.. හැබැයි මේ තරුණයා මන්නාරම් යන්නේ මොහු ද්‍රවිඩ ජාතිකයෙක් හින්දා නෙමෙයි. යුද්ධය කියන ශාපය ලක් මාතාවගේ කුස පිලිසිදගන්න කලින් මන්නාරම කියන්නේ එකසිංහල ගෙදරට යාබදව එක දෙමල ගෙයක් ගානේ තිබුන තැනක්..
ඉතින් මේ තරුණයා ටිකක් මානසික සුවයක් ලබා ගන්නත් එක්ක තමයි මේ ගමන යන්නේ. ඉතින් ගිහින් ටික දවසකින් මේ අපූරු තරුණයා එක්ක ද්‍රවිඩ ජනතාව එක්කාසු වෙනවා කතාබස් කරන්න පටන් ගන්නවා.. ඇත්තටම දකුණේ නැගී එන කලාත්මක හදවතක් තිබුන මේ කතානායකයට මනුස්සයෙක්ගේ සිතකට කිමිදෙනවා කියන එක අපහසු දෙයක් උනේ නෑ. කෙටියෙන්ම කියනව නම් යන යන තැන මිනිස්සුන්ගේ හිත් දිනා ගත්ත මේ තරුණයාට මෙතන ඇතිවුන පිලිගැනීම ගැන අවිවාදයක් නැහැ..
ද්‍රවිඩ ජනතාවට තියෙන්නේ හරි උසස් සංස්කෘතියක්. තමන්ට බත සපයන්න උදවු කරපු හරකට පවා වන්දනාමාන කරන මහ පාරක උනත් ගුරුවරයෙකු දැක්කම දන නමන හැම කෝපි කඩේකම පත්තර ලෑල්ලක් මග ඇරුනේ නැති මිනිස්සු පිරිසක් ලග හරි අපූරු ගුණාත්මක තැන් වගේම අපූරු සංස්කෘතියක් තිබුනා. ඉතින් මේ සංස්කෘතිය තුල අපූරු අත්දැකීම් මේ තරුණයගේ රසගලන තැන් වුනා. මේ අතරෙදි තරුණයට ඥාති වරයගේ නිවස ලගදි හමුවෙනවා තරුණියක්
ඇය නමින් ශාන්තිනී... පලමු හමුවීමෙන්ම දෙනෙත් ආරාධනා මත තාරුණ්‍යයේ සුන්දරම අවධිය පහු කරන මේ දෙදෙනම ආදරයෙන් වෙලෙන්නේ ආදරය කියන වචනයවත් නොකියා. ඇත්තටම ප්‍රේමය කියන දේ කොයිතරම් සියුම් විදියට ගොඩනැගෙනවද ඒ ගොඩනැගීම කෙතරම් කාලයක් සුරැකිව සිතේ තැන්පත් වෙනවද කියලා මේ කතාව අවසානයේ ඔබට වැටහෙයි. ඉතින් මේ තරුණයා හැමදාම ශාන්තිනී එන තැනට එනවලු.
ඇවිත් දෙන්නා ඇස් දිහා බලාගෙන ඉදලා ආයෙම යනවලු. හේතුව ශාන්තිනීට සිංහල බෑ අපේ කතානායකට දෙමල බෑ. දවසක් තරුණයා එනකොට ටිකක් පරක්කු වෙලා. ඒත් ශාන්තිනී මයිනාහම් කඩේ ලගමලු. මේ මයිනාහම් කඩේ අදත් තියෙනවා කියලයි ආරංචිය. තරුණිය හිටියට අන්තිම බස් එකත් ගිහින් ගොඩක් වෙලා නිසා මොහු ලගට ගිහින් හස්ත බාශාවෙන් තරුණියගෙන් ඇහුවම ඇය බොහොම ආදරෙන් කියන්න ගත්තලු ඇගිලි වලින් " ඔයා ඇයි පරක්කු උනේ " කියලා
මේ විදියට ගත වෙච්ච රහස් ප්‍රේමය කොයිතරම් ආදරණීය උනත් උසස් පෙල ප්‍රායෝගික පරීක්ෂණය සදහා මන්නාරමෙන් යන්න සිද්ධ වෙනවා..
ඉතින් කාලයක් උතුර දකුණ යාකරපු මේ අපූරු මිත්‍රය සමුගැනීම වෙනුවෙන් සිංහල දෙමල මිනිස්සු සහ ඔහුගේ ඥාතීන් සංග්‍රහයක් සූදානම් කරනවා...
එදා අපේ කථා නායකයගේ ඇස් අදාහගන්නවත් ඉඩක් නොතිය අර තරුණිය මේ සංග්‍රහට එනවා. ඔහු නොදන්නවා උනාට ඇය එම නිවසට ඉතා ලග අසල්වාසියෙක්..
පස්සේ සමුගැණීමේ කතාවකරන කොට ඔහු කියනවා " මම යන්න හදන්නේ ඔයාලට ආයේ මම මුන ගැහෙයිද දන්නේ නැ "කියලා..
මිනිස්සු විශාල සංඛ්‍යාවක් බලාගෙන ඉදිද්දිම අර තරුණිය ඔහුව බලාගෙන අඩන්න ගන්නවා. ඇත්තටම එවන් ස්තානයක ඇති වෙන වේදනාකාරී හැගීම ඔබත් විදලා දැකලා ඇති. මමත් විදලා දැකලා ඇති...
තරුණයගේ ඇහෙන් වැටෙන කදුලු සිමෙන්ති පොලව සිපගන්න කොට තරුණියගේ පියා ඇයව ඉවත් කරගෙන යනවා ..
පසු කාලීනව ගුරු වෘත්තීයට ඇතුලු වෙලා මොනරාගල පාසලක උප ගුරුවරයෙකු විදියට සේවය කරන කොට ජාතිවාදී අරගල වලින් සිංහල දෙමල මිනිස්සු මරාගන්න හැටි මේ තරුණයා දකිනවා. රේඩියෝවෙන් උතුරේ බෝම්බ වෙඩි හඩ ගැන දැනගන්න ලැබෙනවා... ශාන්තිනී හොදින් ඉන්නවද අහන්නවත් අද තරමේ සන්නිවේදන උසස් තාක්ෂණයක් නොතිබුන ඒ කාලයේ ශාන්තිනී හොදින් ඇති කියලා හිතාගන්න වුනු තරුණයේ ඒ වෙනකොට ලංකාවේ ප්‍රසිද්ධ කලාකරුවෙක්..
ඔහු මේ අපූරු ආදරණීය නිහඩ පෙම් පුවත තුලින් සමාජයට දරුණු ටොක්කක් අනිනව..ඒ මට තේරෙන හැටි....
මේ මම කිව්ව තරුණයා වෙන කවුරුත් නෙමේ රත්න ශ්‍රී. අපි හොදින් දන්නා ඒ අපූරු කලාකරුවා රත්න ශ්‍රී විජේසිංහ. ජූලි කලබල අස්සේ ඔහුට මතක් වෙනවා මයිනර් කාර් එකේ මයිනාහම් කඩෙ පහුකරාම තියෙන මන්නාරම් කන්‍යා බාළිකා විද්‍යාලයේ ඉස්සරහා ශාන්තිනී ඉන්න හැටි... ඔහු ලියනවා අපූරු පද වැලක්.. අන්න ඒක තමයි ජාතිවාදී මුග්ධ සමාජයකට ඇනපු කදුලු පිරි ටොක්ක...අපි බලමු.....
ශාන්තිනී තෙමා වැටෙයි නළල කුංකුමම්
කුංකුමම් තෙමා අහසේ හඬන චන්දිරන්
පහන් පැළට ගිනි ඇවිලී අන්න නැගෙන දුම්
ශාන්තිනි අපි දෙවියන් ඇති තැනකට යං //
කඳුළු උඩට තිරුවංගල් එළිය වැටීමෙන්
නුඹේ මුහුණ කියාගන්න බැරි කවියකි දැන්
බියේ සැලෙන ඔය දෑතේ වළලු ඔය තරම්
බරද කියාපන් කෙල්ලේ බරද කියාපන්
ශාන්තිනී තෙමා වැටෙයි නළල කුංකුමම්...
සියල් සිරිත් දෑ කුළගොත් ඔබ ආපසු ගන්න
මහත්වරුනි ශාන්තිනි විතරක් මට දෙන්න
තිරුක්කුරල් පොත අරින්න දෑස පියාගන්න
මහත්වරුනි මා නෙළු මල මට සිඹින්න දෙන්න
ශාන්තිනී තෙමා වැටෙයි නළල කුංකුමම්... //
මේ ගීතයේ පහන් පැලට ගිනි ඇවිලී අන්න නැගෙන දුම් ශාන්තිනී අපි දෙවියන් ඇති තැනකට යන් කියලා කියන පද වල අරුත සුලුපටු නෑ.. ඔබ දන්නවා පහන් පැල කියන දේ කෝවිලට වගේම පන්සලටත් පොදුයි.පහන් පැලට ගිණි ඇවිලී ඒ කියන්නේ කෝවිලේ සහ පන්සලේ දෙපැත්තෙම ගිනි. ජාතිවාදී වෙලා. ශාන්තිනී දෙවියන් දැන් ඉන්නේ වෙන තැනකට පලා ගිහිල්ලා අන්න අපි ඒ දෙවියන් ඇති තැනකට යන් කියනවා......
මේ කියන්නේ අර සමුගැණීමේ සාදය ගැන. ඒ වේදනාත්මක මතකය ගැන. ඔබ දන්නවා සාමාන්‍යයෙන් උත්සව අවස්තාවකදි ද්‍රවිඩ තරුණියන් දිගු කරාඹු විශේෂයක් දානවා. මෙතන තිරුවංගල් කියන්නේ ඒවට. ඒවගේ එලිය ශාන්තිනී ගේ කදුලු වලට වැටිලා මුහුන කවියක් සේ පෙනෙන බව කියනවා. ඒ කියන්නේ ශාන්තිනී ට සිංහල පුලුවන් උනානම් රත්න ශ්‍රීටත් වඩා කවි ලියයි...ඒ තරම් ඇගේ සිත සංවේදී...
බියෙන් සැලෙන ඔය දෑතේ වලලු ඔය තරම්
බරද කියාපන්
ඒ අවස්තාවේ වැඩිහිටියන්ට බියෙන් වෙවලන අත් දෙක ගැන රත්න ශ්‍රී අහන්නේ ඒ වලලු බරද කියලා ඇත්තටම ද්‍රවිඩ සංස්කෘතිය තුල ස්ත්‍රියට ඇති නීති ගැනද කියලා දන්නේ රත්න ශ්‍රී මහත්තයම තමයි.
මේ පෙම් කතාවට ජාතීන් දෙක හරස් වෙනවා කියලා.. මෙන්න මෙතනදි රත්න ශ්‍රී මහත්තයා ඒ සිදුවීම ආමන්ත්‍රණය කරනවා එදා ඔහුට කියාගන්න බැරි ඌ ඒ කතාව ඔහු ගීතයක පද වැලකින් ලාංකීය ජන සමාජයටම පවසනවා...
සියල් සිරිත් දෑ කුළගොත් ආපසු ගන්න
මහත්වරුණි ශාන්තිනී විතරක් දෙන්න...
තිරුක්කල් පොත අරින්න
දෑස පියාගන්න
මහත්වරුණි මා නෙලු මල මට සිඹින්න දෙන්න
මුල් පද දෙක ඔබට වැටහෙන නිසා තිරුක්කල් පොතන් පටන් ගන්නම්..ද්‍රවිඩ ජනතාවගේ හින්දුආගම සහ සංස්කෘතිය එක්ක එකට මුහුවෙච්ච මේ තිරුක්කල් පොත අරින්න. ඒත් දෑස් වසාගන්න කියලා කියන්නේ. මේ සංස්කෘතිය තුලින් නෙමෙයි අපේ හදවත් වලින් බලන්න මේ සිදුවීම දිහා කියන එක...
මහත්වරුණි මා නෙලු මල මට සිඹින්න දෙන්න
ගීතය අවසාන වෙන්නේ ඔහොමයි..
කරුණාරත්න දිවුල්ගනේ ශූරීන් ගායනා කරන මේ ගීතයට සංගීතය දෙන්නේ විශාරද ගුණදාස කපුගේ මහත්තයා....
මට මතක විදියට ගුණදාස කපුගේ මහත්තයා මෙම ගීතය ගායනා කිරීම ප්‍රතිකේෂ්ප කරලා දිවුල්ගනගේට දීලා තියෙනවා..
"මට වඩා ලස්සනට දිවුල්ගනගේ මේක කියයි රත්න ශ්‍රී "කියලා කියපු කපුගේ මහත්තයා මේකට අපූරු සංගීතයක් එකතු කරනවා...
ඉතින් පස්සේ කාලෙක මේ ගීතය හැදුන හැටි කියලා රත්න ශ්‍රී මහත්තයා පොඩ්ඩක් හිනා වෙලා කිව්වලු ශාන්තිනී රාමලිංගම් දැන් වවුනියාව විදුලි බළමන්ඩලේ ඉන්නවා කියලා..
ඒත් එක්කම "එයාට දැන් ලොකු බබාලා දෙන්නෙකුත් ඉන්නවා" කියලත් කිව්වලු. මේ තරුණයා වෙත කවුරුත් නෙමෙයි මම කියලා හිතාගත්තත් කමක් නෑ කියලා රත්න ශ්‍රී මහතා පවසා තියෙනවා.
No comments:
Post a Comment