සිහිල් සුළං රැල්ලේ... ඔබේ සුවඳ මුසුවේ...
ආදරයේ මඳ සිනිඳු පහස ලැබ හදවත දළු සෙලවේ
සුදු වැලි කතරේ පිපුනු මල වගේ
ලොවුතුරු රස ගංගා
ඔබේ ආදරේ වරුසා වැහැලා
කතර දෙව් ලොවක් වේ
සිහිල් සුළං රැල්ලේ...
සීත හිමව්වේ කඳු ගැට අතරේ
සෙනෙහස දිය දහරා
ඈත හිමේ කඳු අතරේ පාවෙන
අමා සුවය පැතුවේ
සිහිල් සුළං රැල්ලේ...
ගායනය - විශාරද වික්ටර් රත්නායක
පද රචනය - සේන වීරසේකර
සංගීතය - විශාරද වික්ටර් රත්නායක
1966 වර්ෂයේදී බණ්ඩාරවෙල ඇත්තලපිටිය මහා විද්‍යාලයෙන් සිය ගුරු භූමිකාව ඇරඹු වික්ටර්ගේ අතින් “සිහිල් සුළං රැල්ලේ ” ගීතය නිර්මාණය වූයේ ඒ අවධියේදී දුම්රියෙන් බණ්ඩාරවෙල යන අතරතුරදීය. එම තනුවට සේන වීරසේකරයන් මනහර පදමාලාවක් ගොනු කළ අතර එය රසික හදවත් තුළට වික්ටර්ව තව තවත් ලං කරවූ ගීතයක් විය. බොදු බැති ගී ගායනයෙන් සංගීත ක්ෂේත්‍රයට අවතීර්ණ වූ ආචාර්ය වික්ටර් රත්නායකයන්ගේ ජනප්‍රියත්වයට පත්වූ පළමු ගීතය වන්නේ ‘සිහිල් සුළං රැල්ලේ ඔබේ සුවඳ මුසු වේ’ ගීතයයි.
හෙළ හවුලේ ප්‍රකට පඬිවරයෙකු වූ ජයන්ත වීරසේකරයන්ගේ එකම පුතු ලෙස 1942 මැයි 02 වැනිදා අගනුවර දී උපත ලැබූ සේන වීරසේකර ජල තරංග වාදනයෙහි ප්‍රවීණයෙකි. 1968 ගුවන් විදුලි සංස්ථාවේ වාදක මණ්ඩලයට සම්බන්ධ වූ ඔහු මෙරට සෑම ප්‍රවීණ සංගීතඥයකු යටතේම වාද්‍ය ශිල්පියකු ලෙස කටයුතු කළේය. 1968 ඊවා රණවීර නිෂ්පාදනය කළ ‘ඉහළට වහළ නිල් අහසයි’ නාට්‍යයෙන් සංගීත අධ්‍යක්‍ෂවරයකු ලෙස දොරට වැඩි ඔහු චෙරි උයන, මේස, රයිනෝසිරස්, සොක්‍රටීස් ඇතුළු නාට්‍ය රාශියක සංගීත අධ්‍යක්‍ෂණය කළේය.
‘මලට නොඑන බඹරු’, ‘ගොළු මුහුදේ කුණාටුව’, ‘සයනයේ සිහිනය’, ‘තුන්වැනි ඇහැ’, ඔහුගේ සංගීතයෙන් හැඩ ගැන්වූ චිත්‍රපට වේ.
තාරාදේවී, සෙක්කු ගෙදර, ඉසිවර ආසපුව ඇතුළු ටෙලි නාට්‍ය ගණනාවක සංගීතය සැපයූ සේන මිය යන විට සංස්කෘතික දෙපාර්තමේන්තුවේ රාජ්‍ය සංගීත කණ්ඩායමේ උපදේශකවරයා ලෙස කටයුතු කළේය.
No comments:
Post a Comment