ආදරවන්තයා නැත්නම් ආදරවන්තිය අහිමි වුණොත් බොහෝ පෙම්වතුන් හිතනවා තමන්ගේ ජීවිතේ එතැනින් අවසානයි කියලා. නැහැ ඒ ජීවිතයේ අවසානය නොවේ. තවත් අලුත් ජීවිතයක්‌ එතැන් සිට ඇරඹෙන බව සිතෙන්නේ කීයෙන් කී දෙනාටද...
නෙතින් නෙත බලාලා සිතේ දුක නිවා
අදින් පසු මියේවි අපේ ඒ කතා
රකින්නට සෙනේහේ හඬන්නට එපා
නිමාවක්‌ නොවේ මේ ඇරඹුමක්‌ නිසා
මේ පෙම්වතුන් දෙදෙනා වෙන් වෙන්නයි සූදානම. එකිනෙකාගේ දෙනෙත් යාවෙලා. ඇගේ නෙත් පුරා කඳුළු. වියෝ දුක නිවාගන්න නෙතින් නෙත බලා ඉන්නවා. ඔවුන්ගේ ආදර කතාව අදින් පස්‌සෙ මියෑදෙනවා. ඒත් ඇය හඬනවා දෙදෙනාගේ පෙම නොකැඩී රැකගන්න ඇය අඬනවා. එපා හඬන්න එපා. අපි අද වෙන්වුණත් මේක අවසානය නොවෙයි. වෙනස්‌ විදිහකින් සිද්ධවෙන ජීවිතයේ ආරම්භයක්‌ වේවි... අපේ මේ වියෝවීම ඔහු ඈ අස්‌වසනවා.
අහිමි පෙමක්‌ ගැන මේ ගීය ලියුවේ දයා ද අල්විස්‌ අපේ හිතවත් ශිල්පිණිය විසින්.
මේක අත්දැකීමක්‌ නම් නෙවේ. ස්‌ටැන්ලි පීරිස්‌ගේ තනුවකට ලියෑවුනු ගීයක්‌ තනුව දීලා මට කිව්වා වචන ටික දමන්න කියලා. මම භාරගත්තා. තනුවකට වචන දාන්න ටිකක්‌ අමාරුයි. තේරුමක්‌ ඇතිව ලියන්නත් එපායෑ. දයා ද අල්විස්‌ ගීයේ උපත ගැන කියන්න පටන් ගත්තේ එහෙමයි.
ඈත් බව දැනීලා ඔබේ හා මගේ
දුරක්‌ ආ නිසා දැන් දුකක්‌ මේ වගේ
මහා සාගරේ සේ තිබුණත් හිතේ
කුමට හිමි වුණාදොa අහිමි ආදරේ
මේ පෙම්වතුන් දෙදෙනා වෙන් වන්නේ හුඟාක්‌ ආදරය කරලා සෑහෙන කාලයක පටන් ආ ආදර සබඳකමක්‌ දෙන්නට දෙන්නා දැන් ඈත්වෙලා බව දැනෙනවා. කෙටි කාලයක්‌ තුළ හටගත් ආදරයක්‌ නම් වෙන්වීම එතරම් දුකක්‌ නොවේ. ඒත් මේ දුරගිය ආදරයක්‌. ඒ නිසා දුක වැඩියි ඈ කෙරෙහි ඔහුගේ හිතේ උපන් ආදරයේ තරම කියාගන්න බෑ හරියට මහා සාගරයක්‌ වගේ. ඒත් ඉතින් ඒක අහිමි ආදරයක්‌ ඔහුට හිමිවෙලා තියෙන්නේ අහිමි ආදරයක්‌
මේ සිංදුවේ තනුව රෝහණ මටත් කලින් දීලා තියෙන්නේ ප්‍රේමකීර්තිට. ප්‍රේමකීර්ති තනුවට ලස්‌සන පද පෙළක්‌ රචනා කරලා රෝහණට දුන්නලු. ඒත් එක පේළියකට රෝහණ අකමැතිවෙලා. මේ ලයින් එක අයින් කරලා දෙන්න කියල රෝහණ ප්‍රේමකීර්තිට දවස්‌ ගණනාවක්‌ කියලා. ඒත් ප්‍රේම් ඒකට අකමැති වෙලා. තමන් ලියූ ගීයක පද පෙළක්‌ අයින් කරනවට කවුද කමැති, මමත් අකමැතියි. ප්‍රේමකීර්ති පද පෙළ අයින් කරන්න කළ ඉල්ලීම ප්‍රතික්‍ෂේප කළාලු.
"එහෙමනම් මම වෙන කාටහරි දීලා තනුවට පද ටිකක්‌ ලියාගන්නම් රෝහණ ප්‍රේම්ට කිව්වාම හා හා ලියාගනිං." කියලා ප්‍රේම් කියලා. ඉන් පස්‌සේ තමයි රෝහණ මට තනුව දීලා තියෙන්නේ. මම ඔය කිසිම දෙයක්‌ දන්නේ නැහැ. ප්‍රේමකීර්ති කලින් ලියපු බව දන්නව නම් මම මේ පද පෙළ ලියන්නෙත් නැහැ. ඒත් මගේ සිංදුව ජනප්‍රිය වුණාට පස්‌සෙ තමයි රෝහණ ඔය කතාව මට කිව්වේ. මම පද පෙළ ලියුවට පස්‌සේ රෝහණ ඒක ප්‍රේමකීර්තිට පෙන්නලා "හොඳයි ලස්‌සනයි" කියලා ප්‍රේම් කිව්වලු.
පතන්නට පවා මා වරම් අහිමි වූ
හැඟීමක්‌ රිදුම් දේ හෙටට උරුමවූ
දිනන්නට කිසිත් නෑ ලොවේ මින් මතු
මගෙන් ඔබ ඈත්වී ගියායින් පසු
ඔයාට මාවත් මට ඔයාවත් පතන්න තරම් අපි දෙන්නටම වරම් නෑ. ඔයා ගැන හිතන හැම මොහොතකම මගේ හදවත රිදුම් දෙනවා. අද විතරක්‌ නොවේ මේ වේදනාව හෙටටත් උරුමවේවි. ඔයා මගෙන් ඈත්වෙලා ගියාට පස්‌සෙ. මේ ලෝකයේ මම තනිවෙනවා. ඔයා නැතිව මට මොන ජීවිතයක්‌ද. මගේ ජීවිත ගමනේ කිසිම දෙයක්‌ මින් පස්‌සේ සුබ වෙන්නේ නැහැ.
ආදරය අහිමි වූ පෙම්වතා අවසානයේ හිතන්නේ ඒ විදිහටයි. දයා ද අල්විස්‌ ශිල්පිණිය පෙර තනුවකට ලියා ඇති පළමු ගීය මෙයයි. එනිසා මේ ගීතය ඇයට සුවිශේෂී ගීයක්‌. ස්‌ටැන්ලි පීරිස්‌ගේ මේ තනුවට ප්‍රේමකීර්ති ලියූ පදපෙළ දයා ද අල්විස්‌ පවා තවමත් දැක නැහැ. ඒ පද පෙළ ගැන දන්නේ රෝහණ බෝගොඩ විතරයි ස්‌ටැන්ලිත් ප්‍රේමකීර්තිත් අප අතැර ගිහින්.
නෙතින් නෙත බලාලා සිතේ දුක නිවා
අදින් පසු මියේවී අපේ ඒ කතා
රකින්නට සෙනේහේ හඬන්නට එපා
නිමාවක්‌ නොවේ මේ ඇරඹුමක්‌ නිසා
ඈත් බව දැනීලා ඔබේ හා මගේ
දුරක්‌ ආ නිසා දැන් දුකක්‌ මේ වගේ
මහා සාගරේ සේ තිබුණත් හිතේ
කුමට හිමි වුණාදො අහිමි ආදරේ
පතන්නට පවා මා වරම් අහිමිවූ
හැඟීමක්‌ රිදුම් දේ හෙටට උරුම වූ
දිනන්නට කිසිත් නෑ ලොවේ මින්මතූ
මගෙන් ඔබ ඈත්වී ගියායින් පසු
පද රචනය - දයා ද අල්විස්‌
සංගීතය - ස්‌ටැන්ලි පීරිස්‌
ගායනය - රෝහණ බෝගොඩ
No comments:
Post a Comment