පවනට සැලෙනා (Pawanata Salena)
ටී.එම්.ජයරත්න මහතා ගායනා කරන මේ ගීතයෙන් කියවෙන්නේ මව විසින් අතහැර ගිය දරුවකු ඇති දැඩි කරන්නට සිදුවන පියෙක් පිළිබඳවයි. ගීතය රචනා කරන්නෙ ප්‍රවීණ සිනමා කරුවකු වන ධර්මසිරි බණ්ඩාරනායක මහතා. මෙවැනි ගීතයක් රචනා කිරීමට හේතුව කුමක්දැයි කියා පැහැදිලිවම සඳහන් නොවුනත් එය ඔහුගේ ජීවිතයේ ඇතිවූ යම් කම්පනයක ප්‍රතිපලයක් බව ඔහු පවසනවා. ගීතයේ සඳහන් ආකාරයේ සිදුවීමක් සිදුවුවහොත් එය කොතරම් වේදනාජනකද කියා සිතා බැලීමෙන් සිතට එකතු වූ අදහස් අනුව ඔහු මෙය රචනා කළ බව පවසනවා. ගීතයේ සැම තැනකම සඳහන් වෙන්නේ ස්ත්‍රිය තම පෙම්වතාත් සමග සතුටින් දිවි ගෙවන අතරතුර ඇගේම දරුවා පියා සමග දුකෙන් කල් ගෙවන බවයි.
ධර්මසිරි බණ්ඩාරනායක මෙම ගීතය රචනා කළේ ටී.එම්.ජයරත්න මහතාගේ ඉල්ලීමක් අනුව 1970 දශකයේ. ඔවුන් එකල ඒකාධිපති නාට්‍යය සඳහා සුදානම් වෙමින් සිටියා. ටී.එම්.ජයරත්න මහතාගේ සරල ගී එකතුවකට ගීතයක් මදි වූ නිසා ධර්මසිරි බණ්ඩාරනායක මහතාගෙන් ගීත රචනාවක් ඉල්ලා සිටියා. පද පෙළ ලියා දුරකතනයෙන්ම කේමදාසයන් හට දැන්වුවා. කේමදාස මහතා එයට අලංකාර තනුවක් යෙදුවා. ගිටාරය භාවිතයෙන් එකතු කළ ඒ හැඟුම්බර සංගීතය ගීතයේ වේදනාත්මක ස්වරූපය වඩාත් ඉස්මතු කරන්නක්.
ධර්මසිරි මහතා පවසන අන්දමට මෙය ඔහුගේ පළමු හා අවසාන ගීතය. ඔහු එය අබිනික්මන කියා නම් කරනවා. ඔහු බලාපොරොත්තු වූ අයුරෙන්ම මෙම ගීතය ජීවිතය පුරාම අමතක නොවන ගැඹුරු වේදනාකාරී හැගීම් සමූහයක් සිතට ලබාදෙන ගීතයක්.
ගායනය: ටී.එම්.ජයරත්න
පද රචනය : ධර්මසිරි බණ්ඩාරනායක
සංගීතය : ප්‍රේමසිරි කේමදාස
පවනට සැලෙනා දොඹ මල් සුවඳින්
ආදර හසරැලි මුවට නැගෙයිදෝ
සවනට කොඳුරා පවසන වදනින්
ආදර හැඟුමන් සිතට දැනෙයිදෝ...
මල් ඇතිරුණු ඒ සුව යහනේ ඔබ
අඩවන් දෙනෙතින් ආලවඩයිදෝ
මා ඇකයේ සිට පොඩි පුතු හඬනා
ඒ දුක්‌බර හඬ ඔබට ඇසෙයිදෝ...
ඇකයේ සිට මා පුතු හඬනා සඳ
ලේ කිරි වී දැයි නොදනිමි මා ළඳ
අසරණ දෙනෙතින් පුතු දෙස බැලු සඳ
දුටුවේ වැගිරෙන කඳුළු පමණි ළඳ...
පවනට සැලෙනා...
No comments:
Post a Comment