රඹුටන් ගැන කතා කරන විට නිතැතින්ම සිහිවන්නේ මල්වාන හා ඒ අවට ප්‍රදේශයයි. මල්වානේ පැණි රඹුටන් ලෙස සඳහන් කරමින් දිවයිනේ බොහෝ ප්‍රදේශවල රඹුටන් අලෙවි කරති. රඹුටන් වලට මල්වාන ප්‍රසිද්ධව ඇත්තේ එම ප්‍රදේශයේ ඇති පසේ ඇති සරුසාරභාවය නිසාය. මල්වාන ප්‍රදේශයේ බොහෝ දෙනකු සිය දෛනික ජීවිතය ගෙන යන්නේ රඹුටන් වගාවෙනි. ඇතැම් අය සුලුවෙන් රඹුටන් වගා කළ ද ඇතැමුන් මහා පරිමාණයෙන් රඹුටන් වගාවේ නිරතව සිටිති.
රඹුටන් ලංකාවට පැමිණීම පිළිබඳව විවිධ මත ජනප්‍රවාදයේ පවතියි. පෘතුගීසි යුගයේදී ලංකාවට රඹුටන් පැමිණි බව ද සඳහන් වෙයි. සිංහලයන් වඳ කිරීමේ අරමුණින් මෙසේ රඹුටන් පෘතුගීසින් විසින් ලංකාවේ ව්‍යාප්ත කළ බවට ද මතයක් පවතියි. එහෙත් එය සිංහලයන් අතර ජනප්‍රිය පලතුරක් ලෙස ප්‍රචලිත විය.
ඕලන්ද ජාතිකයන් විසින් මැලේසියාවෙන් ලංකාවට රඹුටන් ගෙන ආ බවට තවත් මතයකි. ඕලන්ද ජාතිකයන්ගේ පෙරදිග පෙදෙස්වල වෙළෙඳ මධ්‍යස්ථානය තිබුණේ බතාවිය යයි සඳහන් ස්ථානයේය. මේ නිසා මැලේසියාවෙන් රඹුටන් පැමිණි බව ද තවත් මතයක් පවතියි.
තවත් මතයක් වෙන්නේ ‘රැමිටන්’ නම් නැව් කපිතාන්වරයා සියනෑ කෝරළේ මුදලිවලව්වට මුලින්ම පලතුරු වර්ගයක් ගෙන ආ නිසා රඹුටන් යන නම ලැබුණු බවයි. මෙලෙස රඹුටන් ලංකාවට පැමිණීමෙන් පසු සිය මව්බිම වශයෙන් තෝරගත්තේ මල්වාන ප්‍රදේශයයි. මැලේසියාකරයේ සහ ඒ අවට ඇත්තේ බද්ධ කරන ලද රඹුටන් වර්ග පමණි. තායිලන්තයේ රඹුටන් නැතත් අද එහි ඇත්තේ බද්ධ කරන ලද රඹුටන් වර්ග පමණි. මැලේසියානු රඹුටන් වලට වෙළෙඳ පොළේ ඉල්ලුමක් ඇත. දුටුවන් සිත් ඇද ගන්නා මැලේසියානු රඹුටන් වර්ගය මල්වාන පුරාම දක්නට ලැබේ.
මේ මල්වානේ පැණි රඹුටන් ගැන, ඒවා රැකගන්න වතුහිමියන් දරණ උත්සාහය, මල්වානේ සොබා අසිරිය පිළිබඳව සුසිල් ප්‍රනාන්දු මහතා විසින් රචිත සී.ටී.ප්‍රනාන්දු මහතා විසින් ගායනා කරන මිහිරි ඉතාමත් කලාතුරකින් ඇහෙන ගීතයක් ඇත.
බේරෙන පැණි බිඳු
රස මී වද බඳු
පැණි රඹුටන් ගස් ගානේ
ලේනුන් ගිරවුන්
පලවා හරිමින්
ටකය බැඳෙන මල්වානේ
කුමරිය ඔබ මා දිණූ ගමයි
මා සතු වස්තුව ඔබම තමයි ...//
රුපු බිය වද්දන
පෙර ජයවද්ධන
පුරයයි ඈත පෙනෙන්නේ
කැලණියෙ බෝ පත්
පිස එන සුළඟින්
ඔබ සිල් සුවඳ ලබන්නේ
මිණි මුතු වනමල් දිවා රැයේ
ඔබ පින්බරියකි කුමාරියේ ....//
බේරෙන පැණි බිඳු
රස මී වද බඳු
පැණි රඹුටන් ගස් ගානේ
ලේනුන් ගිරවුන්
පලවා හරිමින්
ටකය බැඳෙන මල්වානේ
කුමරිය ඔබ මා දිණූ ගමයි
මා සතු වස්තුව ඔබම තමයි
ගොයම් කපද්දී
පුරන් කොටද්දී
කුඹුරට බැස යන ගොවියෝ
කැවිලි පෙවිලි බත බුලත රැගෙන එන
නාඹර ඒ ගම් දැරියෝ
ලන මෙන් දෙසවන අම බින්දූ
ගයතී සීපද කවි සින්දූ ...//
බේරෙන පැණි බිඳු
රස මී වද බඳු
පැණි රඹුටන් ගස් ගානේ
ලේනුන් ගිරවුන්
පලවා හරිමින්
ටකය බැඳෙන මල්වානේ
ලේනුන් ගිරවුන්
පලවා හරිමින්
ටකය බැඳෙන මල්වානේ
ගායනය - සී.ටී. ප්‍රනාන්දු
පද - සුසිල් සේනාධීර
තනුව - සී.ටී. ප්‍රනාන්දු
සංගීතය - පැට්‍රික් දෙණිපිටිය
යනීනා නම් පෝලන්ත ගායිකාව 70 දශකයේ දී තැටිගත කළ ගීයක ආභාසයක්‌ සී.ටී. ප්‍රනාන්දු මහතාගේ 'බේරෙන පැණි බිඳු රතු මී වද බඳු' ගීයේ තනුවෙන් පිළිබිඹු වන බව මහාචාර්ය සුනිල් ආරියරත්නයන් විසින් පවසා ඇත.
No comments:
Post a Comment