විශාරද මාලිනී බුලත්සිංහල මිය ගිය වකවානුවේ පටිගත කෙරුණු ‘ඇය යන්න ගියා මැකිලා’ ගීතය මාලිනීගේ වියෝව සම්බන්ධව සුනිල් සරත් පෙරේරා ලියූ ගීයක් ලෙස සමහරුන් සිතුවත් එය එසේ නොවන බව ඔහු කියයි. වරක් තමා කළ සංචාරයකදී බිරිඳ සරෝජනීද සමඟ වස්ගමුවේ සංචාරක බංගලාවේ නැවතී සිටියදී රාත්‍රියේ ඇති වූ සිතුවිලි අනුව එය ලියා ඇත. “එය ලිව්වේ මාලිනීගේ වියෝවට බොහෝ කලින්” ඔහු කීය.
එහෙත් අමරසිරි පීරිස් සුනිල් සරත්ගෙන් පදමාලාව ලබාගෙන තනුව යෙදීමට එච්.එම්. ජයවර්ධනයන්ට ගෙනැවිත් දෙන්නේ විශාරද මාලිනී බුලත්සිංහල (එච්. එම්.ගේ බිරිඳ) අමෙරිකා සංගීත ප්‍රසංගවලට ගොස් සිටියදීය. එච්. එම්. එක් රාත්‍රියක මාදින්නාගොඩ නිවසේදී එම පදමාලාවට ශෝකී තනුවක් යෙදුවේය. එම තනුව යොදනවිට සුනිල්ගේ පදමාලාව තමන් තුළ බලවත් ශෝකයක් හා ගුප්ත හැඟීමක් ඇති කළ බව එච්. එම්. ජයවර්ධන කීය. කෙසේ හෝ වේවා එම සංගීත සංචාරය නිමා කර විශාරද මාලනී බුලත්සිංහල ආපසු මව්බිමට පැමිණියේ නැත. ඒ වකවානුවේම අමරසිරි ගීය ගැයූ නිසා බොහෝදෙනා සිතන්නට ඇත්තේ එය මාලිනීගේ වියෝව හා සම්බන්ධ ගීතයක් කියාය.
ඇය යන්න ගියා මැකිලා
වන සිරසක තුරු සෙවනැලි අතරේ
ගී ගයමින් හිද මා තුරුලේ
ඇය යන්න ගියා මැකිලා...
ඇය යන්න ගියා මැකිලා...
පිණි කඳුලක් මල්පෙති අග තවරා
මිහිදුම් සළුවෙන් මුහුණ වසා
නිල්ල නිලන නිල් කදුවැටි අතරේ
සඳ එලියේ මං පෙත පාදා
රහසක් සඟවා ගොළුවූ හදකින්
යන්න ගියා මැකිලා
ඇය යන්න ගියා මැකිලා...
යලි කවදාවත් හමුනොවෙනා බව..
මද පවණක් හිස අතගා කීවද..
අදහාගන්නට නොහැකිය කිසිදින..
ඇය යලි නොයෙතැයි ගිම්හානෙට පෙර..
ඇය යන්න ගියා මැකිලා...
ගායනය : අමරසිරි පීරිස්
පද රචනය : සුනිල් සරත් පෙරේරා
සංගීතය : එච් එම් ජයවර්ධන
No comments:
Post a Comment