උඳුවප් සීතල සමඟින් නත්තල උදාවෙද්දී බෙත්ලෙහෙම් පුරේ ගීතය කලඑළියට එයි. එය හරියට නත්තලේ තවත් සංකේතයක් බඳුය. අනිල් භාරතී නැමැති ගායන වේදියාණන්ගේ හඬ පෞරුෂයෙන් රස ගැන් වුණු බෙත්ලෙහෙම් පුරේ ගීතය අද වන විට නත්තලට නැතිවම බැරි ගීතයක් බවට පත්ව ඇති වග නම් රහසක් නොවේ. එහෙයින් අනිල් පිළිබඳව ද වැඩිපුර කතා වෙන්නේ උඳුවප් මාසයේය. එය හරියට වෙසක් සමයට මොහිදින් බෙග් මාස්ටර්ව මතක් වන්නා සේය. එතුමාණන් සේම අනිල් ද සැබවින්ම වාසානාවන්ත ගායකයෙකි. ඒ අප රට වෙසක් සමරන තුරු තවත් විදිහකින් කිව්වොත් සදාකාලිකවම බෙග් මාස්ටර් සදා අනුස්මරණය වන්නා සේම නත්තල සමරන තුරු අනිල් භාරතී ද නැතුම බැරි තැනැත්තකු වන බැවිනි. ‘‘මම සංගීත ක්ෂේත්‍රයට පිවිසියේ සංගීත කණ්ඩායමකින්. ඒ කාලේ මම හිටියේ ක්ලැරන්ස් විජේවර්ධනගේ ගෝල්ඩන් චයිම්ස් සංගීත කණ්ඩායමේ. ඒ කාලේ මේ සංගීත කණ්ඩායම බොහෝම ජනප්‍රියයි.
ඇත්ත වශයෙන්ම කිව්වොත් මේ ගීතය පර්යේෂණාත්මක ගීතයක්. මෙහි තනු නිර්මාණය කළේ ක්ලැරන්ස් විජේවර්ධන. පද රචනා කළ කරුණාරත්න අබේසේකර හොඳ බෞද්ධයෙක්. බෙග් ගයන බුද්ධං සරණං ගීතය ලිව්වෙත් කරුනෙ. බලන්න ඔහු කෙතරම් දක්ෂයෙක් ද කියලා. ක්ලැරන්ස්ට ඕනෑ වුණා කරු ලවාම මේක ලියවන්න. ඊට පසුව මං ගැයුවාට පසුව ඉතාම ඉක්මනින් ජනතාව අතරට ගියා.
බෙත්ලෙහෙම් පුරේ ගීතය ඇහුනේ නැත්නම් නත්තල සමහරුන්ට ඇඟට දැනෙන්නේ නැහැ වගේ. බලන්න කොපමණ වාතවක් බෙත්ලෙහෙම් පුරේ ගීතය ප්‍රචාරය වනවාද කියලා. දවසකට දස වතාවක් මේ කාලයේ ගීතය ඇසෙනවා.
දෙවියන් විසින් මට දුන්න ආශිර්වාදයක් හැටියටයි මං එය සලකන්නේ. ඒ අවස්ථාව හැමෝටම ලැබෙන එකක් නෙවෙයි. දෙවියන් වහන්සේ මට දුන්න තලෙන්තු අනුව මං මගේ හැකියාව ඉදිරිපත් කළා. ඒ ගමනේදී මට තවත් සුවිශේෂී තෑග්ගක් මට ලැබුණා. ඒක තමයි බෙත්ලෙහෙම් පුරේ ගීතය.
දලුගම සරසවි ශබ්දාගාරයේදී. පටිගත කළේ හැත්තෑව දශකයේ මුල. මගේ මතකයේ හැටියට මර්වින් රුද්‍රිගෝ නැමැති අති දක්ෂ ශබ්ද පරිපාලකවරයා අතින් තමයි පළමු බෙත්ලෙහෙම් පුරේ ගීතය පටිගත කළේ.
ගීතය පටිගත කරගෙන යනකොට මර්වින් කිව්වා අපි මේකට සීනු හඬක් එක් කරමු කියලා. ඒක කියලා ටික වේලාවකින් මිනිහා පේන්න නැහැ. අපි හොයලා බලන කොට ඔහු පැත්තක තියලා තිබුණු සයිලෆෝන් එකක මකුළු දැල් කඩනවා. ඒක සුද්ධ පවිත්‍ර කරලා අරගෙන ඉන් අපි සීනු හඬ ගීතයට ඇතුළත් කළා.
මේ ගීතය නත්තල් පණිවිඩයක් වගෙයි. දැන් මේ ගීයට වයස අවුරුදු හතළිස් හතයි. මම මගේ තරුණ වයසෙදි ගීය ගැයුවේ. නත්තලට මේ ගීතයත් සමඟ මිනිස්සුන්ට මාව මතක් වෙනවා.
බෙත්ලෙහෙම් පුරේ
දිළිඳු ගව ලෙනේ
ඔරුව තුලේ සිසිලෙ නිදයි
ජේසු බිලින්දා - ජේසු බිළින්දා
ලෙළෙන කැන් දිදී
අමුතු තරුවෙකී
අදුර මැදින් එළිය මවයි
ජේසු බිළින්දා - සාමෙ රජින්දා
නිරිදුන් තිදෙනා
තරුවන් දිලෙනා
මඟ අහගෙන - යති දැකුමට
ජේසු බිලින්දා - සාමෙ රජින්දා
සත වෙත කරුණා
පිනිදිය ගලනා
මුදු උල්පත පාදා දුනි
ජේසු බිලින්දා - සාමෙ රජින්දා
බෙත්ලෙහෙම් පුරේ
දිළිඳු ගව ලෙනේ
ඔරුව තුලේ සිසිලෙ නිදයි
ජේසු බිලින්දා - සාමෙ රජින්දා
ගේය පද: කරුණාරත්න අබේසේකර
සංගිතය: ක්ලැරන්ස් විජේවර්ධන
මුල්ගායනය: අනිල් භාරතී (ගෝල්ඩන් වයිම්ස්)
No comments:
Post a Comment