දිල්හානී දුවණී නාඬා නිදියන්නේ
නිවසට සුරතල් ආලෝකය වී
නාඬා නිදියන්නේ
දෑත දෙපා සලමින් ඇය කරනා
සුරතල් දැක ගන්න
වාසනව මට ගෙන දුන් දියණී
සුරතල් දිල්හානී
රං ඔන්චිල්ලේ ඇයව හොවාලා
පදවන්නට සිතුණා
රං තැටියේ කිරි පැණි පුරවාලා
ගෙන එන්නට සිතුණා
රංවන් තටු ඇති සමනළයින් දැක
ඇයගේ දෙතොල් පිපුණා
රන්වන් මුහුණේ ලස්සන දැකලා
සිපගන්නට සිතුනා
දිල්හානී දුවණී නාඬා නිදියන්නේ
නිවසට සුරතල් ආලෝකය වී
නාඬා නිදියන්නේ
පද රචනය - ක්ලැරන්ස් විජේවර්ධන
සංගීතය - ක්ලැරන්ස් විජේවර්ධන
ගායනය - ඉන්ද්‍රාණි පෙරේරා
ගීතය රචනා කර තිබෙන්නේ ක්ලැරන්ස් විජේවර්ධන මහතා. ගීතයේ කියවෙන දිල්හානි දියණිය නම් සිරිසඟබෝ කොරයා මහතාගේ දියණිය වන දිල්හානි කොරයා මහත්මියයි. ක්ලැරන්ස් විජේවර්ධන මහතා 'මූන්ස්ටෝන්' සංගීත කණ්ඩායමේ පුහුණු වීම් සිදුකලේ කොරයා මහතාගේ නිවසේ. දිල්හානි කොරයා මහත්මිය පවසන ආකාරයට ගීතයේ ඇරඹුම මෙසේ සිදුවිය;
"පුංචි කාලේ මම හරියට අඬනවාලු. ඉතින් මාව නලවන්න අන්කල් මාව තොටිල්ලේ තියලා තොටිල්ල හෙමිහිට පද්ද පද්ද අන්කල්ගේ ගිටාර් එක වාදනය කරද්දි මම අඬන්නේ නැතිව අන්කල් කියන සින්දු අහගෙන ඉන්නවාලු. ඔය වගේ දවසක මාව නලවන කොට තමයි අංකල්ට හිතුණේ මම වෙනුවෙන් ගීයක් නිර්මාණය කරන්න."
මේ ගීතය ඉන්ද්‍රානිගේ පෙරේරා මහත්මියගේ හඬින් ඇසෙන්න පටන් ගත්තාම බොහෝ දෙනෙක් හිතලා තිබුණේ ක්ලැරන්ස් මේ ගීතය හැදුවේ එකල ජනපි‍්‍රය නිළියකගේ දියණියට කියලා. නමුත් ක්ලරන්ස්ට මේ විස්තරේ දැනගන්න ලැබුණහම ගොඩක් දුක හිතිලා. ඒ නිසාම තමයි නව රඟහලේ පැවැත්වූ සංගීත සංදර්ශනයකදී ඔහු දිල්හානි දියණිය වේදිකාවට ගෙන්වලා තුරුළු කරගෙන හැමෝටම හඳුන්වලා දුන්නේ. ඔහුගේ ගීතයේ කියැවුණු ආදරණීය දිල්හානී දියණිය ඇයයි කියලා. එදා තමයි බොහෝ දෙනෙක් දැන ගත්තේ මේ ගීතය හැදුවේ වෙන කාටවත් නෙමෙයි. සිරිසඟබෝ කොරයාගේ දියණියට කියලා.
No comments:
Post a Comment